Lenkawl

Thla thar September 6-a Baktawng VC-a Seat ruak (Reserved Seat) hnawhkhahna tura by-election neih tura chuh tumte tana hming pekluh theih hun chu Vawiin tlai hian a tawp dawn a, nimin thleng khan inthlanna chuh tura hming pelut mi pakhat chiah ala awm.

Serchhip District chhung Bungtlang khuaa leimin in tun thla ni 5-a chenna In pahnih a tih-chhiatna hmun chu nimin khan Serchhip Sub-Hqrs. YMA hruaitute chuan an President Kawlthuama hovin an tlawh.

National Highway-54 laihzauh leh siamthat hna thawh mekin Serchhip khawpui chhung a helna tur kawng, By-Pass Road laih mekah he hna enkawltu NHIDCL ten Forest Clearance leh Spoil Bank mumal nei lova hna an thawk nia sawi a nih hnuah Company lam ten tunhnaiah hna an chhunzawm leh nia sawi a awm avangin nimin khan Serchhip Forest RO Lalsangpuia Pachuau chuan helai hmun hi a enfiah a. Helai hmuna hnaa thawk mektu Company te chuan kawng laih hna hi an chhunzawm loh thu sawiin, tunah hian leivung an paihna (Spoil Bank) dawlna tur Retaining Wall siam hna an thawh mek thu an lo sawi a, hemi atan hian an hnathawhna hmun then-khat a Lung te chu khawl hmanga an lak thu an lo sawi bawk a ni.

Serchhip Chhim Veng lam chawmtu Electric Transformer chu tunhnai khan a chhia a, siamthat theih hun tur hriat mai a nih loh avangin khawtlang hruaitute chuan Sailiam-a Horticulture Department te chu hawh sakin Serchhip Chhim Veng hi eng pek mek a ni. Hetianga mipuite eng pekna lama harsatna a awm avang hian Serchhip Chhim Veng VC te chuan an harsatna hi bialtu MLA Lal-duhoma hnenah thlenin ani hian hma a lo lak sak a, hemi chungchangah hian Serchhip Block ZPM chuan nimin khan thuchhuah siamin bialtu MLA hmalakna zarah Serchhip Chhim Veng chuan Transformer tha an neih thuai dawn thu leh tunah hian Serchhip lama phurhchhoh mai theih tura peihfel a nih tawh thu an tarlang a ni.

Sipai lak runpui, Army Recruitment Rally (Agnipath Scheme) chu kumin October 4 atanga October 9, 2022 inkar chhung khian Rajiv Gandhi Stadium, Mualpui-ah Mizoram pum tan buat-saih a ni dawn a, Online Registration hmanga dil tur a ni ang. A dil duhte chuan September ni 30, 2022 ralhmain www.joinindianarmy.nic.in ah ngaihven theih a ni ang. Tun tumah hian mipa tan chauh (male candidate) Sipai lakna hi neih a ni dawn tih sawrkar thuchhuah chuan a tarlang tel bawk.

Nimin tlai thleng khan Serchhip District-ah COVID-19 hri kai enkawllai mi 16 an la awm a, tunhnaiah hri kai enkawllai hi nasa takin an tlahniam a ni.

Nimin khan Serchhip District-ah African Swine Fever (ASF) vanga Vawk thi 5 lai a awm belh leh a, heng te hi East Lungdar khua vek niin an zinga pathum chu Vawk puitling a ni  bawk. Heng te nen hian East Lungdar khua ah hian ASF vangin kumin ah Vawk 101 a thi ta a, Serchip District-a ASF vanga Vawk thi tamna ber khua ni mekin Vawk 27 suat a ni tawh bawk a ni. Nimin khan Serchhip District-ah ASF hri lenna hmun ni lo ah Vawk pathum a thi ve leh bawk a, heng te hi Leng khua bakah Serchhip Hmar Veng leh Chanmari Veng-ah pakhat ve ve a ni a, Chekawn khua ah Vawk 9 lai suat belh leh a ni bawk.

Tun thla ni 2 zan dar 6:30 bawr vel a Tlawng lui Sihhmui/Lengte kai, Leidawh bula Car chesual a tel, Malsawmkima (10) ruang chu nimin dar 10:00 rik hma deuh khan Tlawnglui Changsil kai ah hmuh a ni a, an chetsual atanga ni 15 hnuah a ruang hi hmuh a ni.

Lawngtlai District Level Committee on Narco Coordination Centre (NCORD), District Level Nasha Mukt Committee leh District Level Task Force on Ruihhlo Do te chu nimin khan aan Chairman leh Lawngtlai DC Amol Srivastava hovin Lawngtlai DC Conference Hall-ah an thu-khawm a, an District-a ruihhlo dinhmun leh a dona kawnga an hmalakna te thlirho niin Ruihhlo zawrh tihtlem (supply reduction), hman khawloh tihtlem (demand reduction) leh chhiatna a thlen tihtlem (harm reduction) kawnga hmalak dan tur hrang hrangte sawiho a ni. He Meeting hian Department hrang hrangte'n August ni 25 hmain an hmalakna tur 'Action Plan' siamin DC-ah thehlut se, chumi hmang chuan 'District Action Plan' siama hmalak zui nise an ti a, August thla ralhma in District chhung khaw tinah Village Level Task Force on Ruihhlo Do din fel nise an ti bawk.

Niminpiah khan Mizoram-ah COVID-19 hri kai mi 222 lai hmuh belh leh an ni a, nimin tlai thleng khan hri kai enkawllai pawh mi 597 an awm leh tawh.