Baktawng VC (Reserved Seat) by-election chuh turin mi pakhat in hming a pelut tawh
He inthlanna neih tura Returning Officer K. Vanzama hnen atanga LENKAWL thudawn danin Baktawng VC-a Reserved Seat ruak hnawhkhahna atana by-election neih tura chuh tum te tana hming pekluh hun hi Vawiin tlai dar 3:00 thleng hawn a ni dawn a, he inthlanna chuh tur hian MNF Party atangin Lalremliani chuan nimin khan Nomination Paper thehlutin amah chiah hi nimin thlenga Nomination Paper thehlut a la awm a, Congress leh ZPM Party te chuan nizan khan Candidate tur hi tifelin Vawiin ah Nomination Paper thehluh an tum nia thudawn a ni.
Baktawng VC-a by-election neih tur atan hian State Election Commission chuan Returning Officer turin Govt. Baktawng H/S-a thawk K. Vanzama chu a ruat tawh a, ani bakah hian Election Office atangin Presiding Officer (PRO) 2 leh Polling Officer (PO) mi pali (4) ruat an ni tawh bawk a, hun reilote ah Training pawh buatsaih tum a ni bawk. Baktawng VC by-election neih turah hian Polling Station pakhat siam a ni dawn a, hetah hian Vote thlakna hmun (Voting Compartment) pahnih siam a ni dawn thung a, an VC hnuaia awm Buhkangkawn Sub-Village te pawhin helai hmunah hian Vote an thlak dawn a ni.
Serchhip District chhung Baktawng VC-ah hian Seat 5 awmin Seat khat chu Hmeichhe tana Seat hauh a ni a, VC inthlan hnuhnung berah MNF in Seat 3 leh Congress in Seat 2 lain MNF hian sawrkar an siam a, MNF atanga thlantlin Reserved Seat luahtu chuan eizawnna dang avanga a Seat a kalsan tak avangin a Seat ruak hnawhkhat tur hian State Election Commission chuan inthlanna hi a buatsaih dawn a ni. He inthlanna a hman tur Electoral Roll enfiah hna pawh thawh ni tawhin Electoral Roll thar bera a lan danin Baktawng Village Council-ah hian Voters 1126 an awm mek a, an zinga 545 chu Mipa niin midang 581 hi Hmeichhia an ni.
Comments
Post a Comment