Ni 15 hnuah ruang pakhat hmu

Tun thla ni 2 zan dar 6:30 bawr vel a Tlawng lui Sihhmui/Lengte kai, Leidawh bula Car chesual a tel, Malsawmkima (10) ruang chu nimin dar 10:00 rik hma deuh khan Tlawnglui Changsil kai ah hmuh a ni a, an chetsual atanga ni 15 hnuah a ruang hi hmuh a ni.

Thudawn danin Buichali Lei bul-a hnamdang awm ten tui a ruang lo lang an hmu a, Sairang Police te hriattirin Police lamin Sairang Dinthar, Sairang leh Sihhmui YMA te an hriattir nghal bawk a, a ruang hi lakchhuah zui niin tun thla ni 2 zan-a chesual Malsawmkima ruang ngei a ni tih finfiah a ni a, Sairang Dinthar Branch YMA ten kuang siam sakin Postmortem a nih hnuah nizan khan vuiliam nghal a ni. Nimin-a ruang an hmuhna hi an chetsualna atanga KM 4 vela hla nia thudawn a ni.

Hetihlai hian he chetsualna a tel leh Mal-sawmkima pa, C. Lalfakzuala ruang nia ngeia hriat chu nimin khan Tlawng lui-ah hian hmuh a ni bawk a, amaherawh chu lakchhuah a nih hmaa an hloh leh avangin he thu buatsaih lai thleng hian zawn hna ngawrh taka thawh a ni.