Chhiatna thlenna hmun tlawh

Serchhip District chhung Bungtlang khuaa leimin in tun thla ni 5-a chenna In pahnih a tih-chhiatna hmun chu nimin khan Serchhip Sub-Hqrs. YMA hruaitute chuan an President Kawlthuama hovin an tlawh.
Bungtlang-a leiminna hmun tlawhtu YMA hruaitute hi Bungtlang Bazar Branch YMA hruaitute leh VC ten lo dawngsawngin inkawmna an nei a, YMA hruaitute chuan chhiatna dang thleng te a awm avanga a tir lama an tlawh mai thei lo chu pawi an tih thu sawiin, leimin avanga In chhia te tana In sak hna thawh mekah a tul anga thingpui lumna atana hman turin Rs. 5000 an pe nghal bawk a ni.

He hunah hian Bungtlang YMA hruaitute pawhin vanduaina thlen dan leh hma an lak zui dan te YMA Sub-Hqrs. hruaitute hi lo hrilhin, harsatna an tawh ah a theih anga hma lakpui turin an ngen a. He vanduaina thlenga In chhia mi 2 zinga pakhat zawk tan hian In sak hna thawh mek a nih thu leh hun remchang ah pakhat zawk hi sak leh tur a nih thu sawiin, In chhia-a bungrua (puantahna) leimin in a chhilh mek haichhuah a nih theih nana khawl an mamawh ah a theih anga Company hotute lo nawrpui turin an ngen bawk a ni.