Lenkawl

YMA Day vawi 87-na chu nimin khan Mizoram chhung leh pawna YMA dinna hmun hrang hrangah urhsun taka hman niin Serchhip-ah pawh Branch YMA hrang hrang ten an remchan angin an hmang a, Serchhip Sub-Hqrs. YMA hruaitute pawhin Branch thenkhat ah an hmanpui bawk.

Nimin khan Serchhip District-ah COVID-19 hri kai hmuhchhuah thar leh enkawl dam an awm belh lova, COVID-19 hri kai enkawllai mi pakhat la awmin East Lungdar khua a mi a ni. Nimin tlai thlenga Serchhip District-a CO-VID-19 hri kai hmuhchhuah tawh chu 14,009 niin an zinga 13,973 te chu enkawl dam an ni tawh a, hri kai hmuhchhuah atanga chhutin za zela 99.74 te enkawl dam an ni tawh a ni.

Khawlailung Bazar Branch YMA te chuan an din hnua a vawi khatna atan nimin khan YMA Day hmangin Serchhip District Fisheries Development Officer Lucy Lalrinpuii chuan khual-lian niin a hmanpui a ni.

Serchhip Bialtu MLA Lalduhoma chuan a bial chhunga Neihloh Branch YMA in nimin a YMA Day an hman chu khuallian niin a hmanpui.

Cancer damdawi chikhat 'Dostarlimab' chung-changah sawrkar chuan mipuite fimkhur turin a chah.

Siaha New Colony Veng-a Sinking Area chu nimin khan Siaha District Bawrhsap Lalsangliana hovin Mizoram sawrkar-a Geology & Mining Department Joint Director H. Lalbiakkima te chuan tlawhin lei tlakhniam dan leh lei tlahniamin helai huamchhunga kawngpui leh In leh lo a tihchhiat dan te a enfiah a. He an enfiahna atang hian report siamin, Geology & Mining Department hnenah an thehlut anga, Department ten hmalak theihna tur an nei em tih an lo zirchiang leh dawn a ni.

Mizoram Journalists' Association (MJA), Lawngtlai District ten kum 2016 atanga kumtin Green MJA Day an hman thin chu nimin khan a vawi 7-na atan an hmang a, Lawngtlai DRDA Project Director Marilyn Rualzakhumthangi chuan a hmanpui a ni. He hunah hian MJA Member te hian DRDA Office bulah thingtiak an phun zui nghal bawk a ni.

Health Minister Dr. R. Lalthangliana chuan nimin khan Aizawl Kanan Branch YMA ten YMA Day puala hun an hman chu hmanpuiin YMA member te chu midangte tana malsawmna thlentu leh mi harsate tanpuia chhawmdawltu an nih avangin an taksa hriselna ngai pawimawha, engtik lai pawha in fit taka awm reng turin a chah a. YMA anga pawl ropui leh tangkai, khawtin leh Veng tin dapa pawl tupawh huap ang chi hi India ram chu sawi loh, khawvelah pawh hian an awm lo tih sawiin, YMA danglam bikna leh inenkawlna tha tak hi thangtharte tan leh khawtlang tan a hlu em em a ni, a ti a. Damlo a mamawhtute tana YMA Branch hrang hrang ten a thlawna thisen an pe thin chu lawmawm a tih thu pawh sawiin, midangte nunna chhanna tura YMA hnathawh hi a ropui takzet a ni, a ti bawk.

Mizoram Rajya Sabha MP K. Vanlalvena chuan Zophai-a Mizo IR Camp leh Rail Station a buhfai unload chungchanga FCI in harsatna a tawh thin te niminpiah khan a hmunah a enfiah a, IR Camp-ah hian an Commander Inspector F. Tlanghmingthanga'n lo dawngsawngin ramri bulhnaia Mizoram Police duty te mamawh leh tul dangte a sawipui a ni. FCI Consultative Board Chairman nilai K. Vanlalvena hian Rail Station tlawh nghalin FCI buhfai, Rel-in Bairabi a rawn phurh thlen thin unload chhung a rei lutuk thin avanga buhfai vawi khat rawn thlen ah Waiting Charge cheng nuai 5 bawr lai hmanral a ngai ziah thin chu pumpelh theih dan turte a endik a ni.

Nimin atang khan Civil Hospital Lunglei leh Christian Hospital Serkawn-ah thlawna zai runpui - ‘Free Surgical Camp’ buatsaih niin Vawiin ah chhunzawm leh a ni ang.