Cancer damdawi-ah fimkhur turin mipuite chah

Cancer damdawi chikhat 'Dostarlimab' chung-changah sawrkar chuan mipuite fimkhur turin a chah.

Hemi chungchanga Lalsawma, Jt. Director (F&D), Controlling & Licensing Authority in thuchhuah siama a tarlan danin tunlaiin Mizo-ram-ah Cancer damdawi chikhat 'Dostarlimab' chu mithiamten Tai (rectum) Cancer atan a tha a ni tih an zirchianna England Journal of Medicine-a June ni 5, 2022-a an chhuah, an thuziak thenkhat Mizo tawnga lehlin, Facebook leh Whatsapp Group hrang hranga thawndarh a nasa hle tih hriat a ni tih a tarlang a. Dostarlimab hi Cancer damdawi atana hman reng tawh thin a nih thu leh Medical Oncologist-te hriatpuina nen chauha fimkhur taka hman ngai damdawi a nih thu leh Damdawi dang ang bawkin a hman tangkai theihna dang an dapna lamah zirtuten Rectal Cancer enkawl nan a tha tih an hmuh belh a ni tih tarlangin, hetianga thuziak lo vawrhdarha lo buaipui chiam hi damlote rilru tihchiai theihna a nih avangin tih loh atan a that thu leh Damdawi lama hmalatuten a hunah chuan hma an la mai dawn tih a tarlang a. Chutih laia Cancer natna vei mekte hman mai theih tur ang hrima a zuar rawngkaia hma lo lak phei chu dan kalh tlat a ni tih a tarlang bawk.