Serchhip-a YMA Branch hrang hrang ten YMA Day vawi 87-na urhsun takin an hmang

YMA Day vawi 87-na chu nimin khan Mizoram chhung leh pawna YMA dinna hmun hrang hrangah urhsun taka hman niin Serchhip-ah pawh Branch YMA hrang hrang ten an remchan angin an hmang a, Serchhip Sub-Hqrs. YMA hruaitute pawhin Branch thenkhat ah an hmanpui bawk.


YMA Day pual hian Serchhip khawpui leh a chhehvela Branch YMA hrang hrangte chuan an Member te bakah YMA Chhang te nen hlimtaka hmangin, Branch YMA tam zawk chuan mi harsa zawk tanpuina leh khawtlang tana thil tha tihna atan te, YMA Member intihhlimna atan leh zirlai titha chawimawina hun atan bakah YMA Kumpuan Thupui zirhona atan te an hmang a. Thawhlehni zan atanga hmang an awm bakah nizan lama hun hmang te pawh an awm bawk a ni.



Serchhip Sub-Hqrs. YMA Secretary PC. Vanlalluna chuan nimin khan New Serchhip Venglai Branch YMA ten New Serchhip YMA Hall-a YMA Day puala hun an hman chu hmanpuiin Mizote kan tlem avanga inthlahpun kan ngaih thu a sawi a, Mizo hmeichhia ten Mizo diktak an hrin pun zel a tul thu sawiin, ram leh hnam humhalh tur chuan zirna ah tan kan lak nasat a ngai a, taimakna nen hmathlir fel tak nei chunga thil kan tih a ngai tih a sawi a. Ruihhlo laka kan fihlim a tul zia leh ruihhlo do kawngah pawh YMA pawh theihtawpa tan a ngaih thu sawiin, eizawnna kawngah pawh sawrkar rinchhan lova mahni a intodelh tura tan kan lak loh chuan ram leh hnam humhalh a harsat thu a sawi bawk.

Serchhip Sub-Hqrs. YMA Asst. Secretary K. Laltlanmawia chuan Chanmari Branch YMA in DIET Multipurpose Hall-a YMA Day an lawmna hmanpuiin Ram leh hnam humhalh tih hi YMA hian kum 13 ngawt Kumpuan-ah an lo hman tak thu leh YMA thinlung-ah a tla na hle a nih a rinawm tih a sawi a. Ram leh hnam humhalh kawngah ram leilung fate kan induhsak thiam a tul tih sawiin, fa neih tam kawnga tan lak te, Zu leh ruihhlo do kawngah tanlak te a tul takzet tawh tih a sawi a, damrei tura kan hriselna thlenga kan ngaih pawimawh a tul thu sawiin, “Mizoram hi a damlo mek a, a enkawl dam turin YMA member-te tan kan lak a, kan thawhchhuah a ngai a ni,” a ti bawk.

Serchhip Town chhunga YMA Branch 21 zinga a tam zawk ten ruahman anga YMA Day an hman laiin nimin khan Chhiahtlang-ah chuan mi pathum lai boral an awm avangin Chhiahtlang Chhim Veng Branch chuan an Programe ruahman zawng zawng an thulh a, Chhiahtlang Kawn Veng Branch pawhin an Programme thenkhat an thulh phah bawk a ni.

Comments

Popular posts from this blog

Bialtu MLA in Laptop pe