Serchhip-a AH&Vety Department in an chhinchhiah danin Inrinni leh nimin, Pathianni ah te khan Serchhip District-a ASF vanga Vawk thi an awm belh lova, Serchhip District-a ASF vanga Vawk thi a awm hnua a ni zawn-a ASF vanga Vawk thi an awmloh hmasak ber nia hriat a ni bawk. Heti hian nimin thlenga Serchhip District-a ASF hri lenna khaw 35-a ASF vanga Vawk thi chu 3870 a tling tawh a, Vawk 3040 suat ni tawh bawk a ni.
Inrinni khan Mizoram-ah COVID-19 hri kai mi 387 hmuhchhuah an ni leh a, hri kai hmuhchhuah hi tlem deuh mah se Sample enfiah 3029 aatanga chhut chuan za zela 12.78 zetin hri an la kai thung a ni.
Zo People’s Movement (ZPM) Legislature Party chuan Mizoram State Health Care Scheme (MSHCS) hnuaia inziaklut mekte tan an inenkawlna senso cheng nuai 2 thlenga Bill let phalsak turin sawrkar an phut tih an sawi.
Mizoram Population Based-Cancer Registry (PB-CR)-in a chhinchhiah danin, kum 2016 atanga kum 2020 (kum li) chhung khan Mizoram-ah Cancer vanga thi mi 4638 an awm a. Kum 2019 atang khan kum khat-ah Cancer vanga thi hi mi sang khat aiin an tam a ni.
Naupang kum 5 hnuailam zinga Pneumonia vanga thihna ti tlem tura beihpui thlakna programme, Social Awareness and Actions to Neutralize Pneumonia Successfully (SAANS) chu nimin khan Mizoram hmun hrang hrangah hawnna neiin Serchhip-ah pawh he Programme hi hawngin AHSH te hmalak dan tur inhrilhfiahna neih nghal a ni.
Serchhip District chhunga Sialsir khua ah nimin khan African Swine Fever (ASF) vangin Vawk pakhat a thih belh leh a, heti hian Sialsir khua ah hian ASF vangin Vawk 59 a thi tawh a, Vawk 2 suat a ni tawh bawk a ni. Nimin-a ASF vanga Vawk thi nen hian Serchhip District pumah ASF vangin Vawk 3870 a thi tawh a ni.
Serchhip Vengchung Branch YMA te chuan nimin khan Serchhip Blood Bank-a dah turin Thisen Unit 15 an pe a, thisen petute hi Mipa 22 leh Hmeichhia 3 te niin heng mi tlawmngai te hi Blood Bank-ah kalin thisen hi an pe a ni.
Zirna lama India ram dinhmun dik tak tar-lanna ni thei tura ngaih National Achievement Survey (NAS) chu nimin khan ramchhung hmun-dangte rualin Serchhip District-ah pawh neih a ni.
Mizoram State Rural Livelihoods Mission (MzSRLM) East Lungdar Block Mission Management Unit (BMMU) hmalaknaa North Vanlaiphai-a Women Seven Star Self-Help Group (SHG) ten Plastic Bottle siamchhuahna tur, Women Seven Star Bottle Manufacturing Plant chu nimin khan hman theih tura hawn a ni.
Niminpiah khan Mizoram-ah Sample 4426 enfiah leh niin heng atang hian COVID-19 hri kai mi 631 zet hmuhchhuah leh an ni a, Sample enfiah atanga za zela 14.26 te chuan hri an kai a ni.