Serchhip District-a a hmasa ber ni turin N. Vanlaiphai-ah Plastic Bottle siamna hawn a ni

Mizoram State Rural Livelihoods Mission (MzSRLM) East Lungdar Block Mission Management Unit (BMMU) hmalaknaa North Vanlaiphai-a Women Seven Star Self-Help Group (SHG) ten Plastic Bottle siamchhuahna tur, Women Seven Star Bottle Manufacturing Plant chu nimin khan hman theih tura hawn a ni.
North Vanlaiphai Presbyterian Hall-a he hun hman hi MzSRLM-a Chief Executive Officer, H. Lalchhandami chuan hmanpuiin SHG Member ten hmalakna tha tak tak leh hlawhtlinna ropui tak an nei thin chu lawmawm a tih thu sawiin, MzSRLM leh Line Department hrang hrangten thawhhona tha tak an nei thin chu lawmawm a tih thu a sawi a. He Bottle Manufacturing Plant pawh hi Line Department hrang hrang MzSRLM, PMKSY, KVK, DRDA leh Horticulture te nen thawkho a din anih thu sawiin, Rs. 18,50,000/- sen a ni tih a sawi a ni.

Nimin-a hawn tak Bottle Manufacturing Plant atang hian Plastic Bottle size chi hrang hrang siamchhuah theih a ni dawn a, Plastic Bottle te hi chahlut turin a phurh kualna a hautak avang leh hmun a heh avangin a siamna hmanrua (Mould), kut zungtang tiat vel lek lek chu chahlutin he khawl an bun thar tak hmang hian mamawh ang tiat zelin Bottle hi siamchhuah/hampuar theih a ni tawh dawn a, he khawl hian darkar khatah Bottle 600 vel a siam chhuak thei a ni. He khawl bunna atan hian North Vanlaiphai VC ten ram pe in DRDA kaltlangin a building sak a ni a, KVK ten hnathawh dan zirtirin a sum tul ang te MzSRLM atangin pek an ni a. Women Seven Star te hian a khawl hi an enkawl zui dawn a ni. Hetiang khawl hi Aizawl District-ah pathum vel awm tawhin Serchhip District-ah chuan a hmasa ber tur a ni dawn a, hei hi Tui leh Theitui chi hrang hrang zuartute tan pawh tangkai hle tura beisei a ni.

Nimin-a Bottle Manufacturing Plant hawn a nih hnu hian BMMU, MzSRLM, E.Lungdar buatsaihin Block Level Credit Camp chu neih chhunzawm nghal niin he hunah hian E. Lungdar RD Block huamchhunga Mizoram Rural Bank pathum- MRB E. Lungdar Branch, MRB Khawlailung Branch leh MRB N. Vanlaiphai Branch atangin SHG 50 te hnenah Bank Loan Rs. 1,21,00,000/- (cheng nuai 121) semchhuah a ni a. Hemi rual hian Tuichangral Mini SARAS Fair chu N. Vanlaiphai Bazar-ah buatsaih nghal ni bawkin E.Lungdar RD Block huamchhunga Village Organisation (VO) 10 atangin SHG ten an thil siamchhuah leh thlai tharchhuahte te an zuarchhuak a, SHG member te leh khawtual miten an hlut hle a ni.

Nimin-a heng program te hi East Lungdar BDO H. Lalhruaitluanga chuan kaihruaiin MzSRLM-a State Mission Manager, F. Ramdinthara leh KVK North Vanlaiphai-a Senior Scientist and Head Dr. T. Vanlalngurzauva bakah E. Lungdar RD Block huamchhunga MRB Branch Manager ten hmanpuiin thusawina hun an hmang bawk a ni.

Comments

Popular News (Last 30 Days)

Serchhip DCSO sawn a ni