Chanchin thar thenkhat :

Chief Secretary in tlawh

Mizoram Chief Secretary Dr. Renu Sharma chuan NLCPR/NEC hnuaia sak mek Project pathum - Treasury Square-a I&PR Department sak mek Lianchhiari Rûn; Mualpui-a Govt. Aizawl College New Campus leh MINECO-a High Court sak mekte chu Inrinni khan a tlawh a, Planning & Programme Implementation Secretary Lalmalsawma Pachuau-in a tawiawm a ni. Chief Secretary chuan heng project sak mekte hi enin, Contractor-te chu hnathawh dan tlangpui leh an sak zawh hun tur te a zawt a. Heng building a awm tur thilte chu chipchiar taka zawtin chungte chu building sak zawh hma ngeia ruahman a dahfel ngei turin a hrilh a ni. Lianchhiari Rûn a tlawhnaah hian I&PR Director Lallianpuii chuan helai hmun hi sawrkar tan hmun tangkai tak a nih dan turte Chief Secretary hi a hrilh a ni.


Dec. 16-ah YMA Gen. Conf.

Inrinni-a Central YMA Executive Committee (CEC) thukhawm chuan kumin a YMA General Conference vawi 73-na neih hun atan December 16, 2021 chu an ruat a, a hmun tur erawh tihfel ala ni lo thung. Kumin hian hri leng avangin YMA General Conference-a Rorel Palai kal tur pawh tih tlem a ni a, Central YMA OB, CEC Member te, Sub-Hqrs. YMA OB te, Sub-Hqrs. YMA Executive Member atangin mi 5 theuh, Group leh Branch YMA aiawh mi 3 theuh leh Central YMA OB hlui te chu Rorel Palai leh hruaitu thlanna a kal thei an ni ang.

Hei bakah hian CEC thukhawm chuan Electoral Roll Special Summary Revision 2022 lo awm turah khua leh tui dik tak chauh Roll a an luh theih nan Branch YMA tinte hma la turin an ngen bawk a. Electoral Roll-a chuang tawh, Khua leh tui dik tak ni lo, Electoral Roll atanga paih duhte chu complaint thehlut ngei tura ngenin, Complaint-na Form hi Designated Officer (DO)/Booth Level Officer (BLO) te hnen atanga lachhuakin, fill up zawhah thehluh leh turin a hriattir bawk.


BJP in YMA hnenah hlan

BJP Mizoram Pradesh chuan Zirtawpni khan Darlawn Chhim Veng Branch YMA te hnenah Oxygen Concentrator leh Oximeter pakhat ve ve chu mamawhtute hman turin a hlan a, heng an thilpek hlanna hunah hian BJP President Vanlal-hmuaka chuan sawrkar laipui atanga hri leng dona hmanrua kan dawn te a mamawhtute hnenah a nihna angin a thleng tawklo nia a lan thu a sawi.


MNF in mi 911 lawmlut

MNF Sub-Hqrs. Lunglei chuan tunhnaiah Thorang MNF Block-I huamchhung khaw 17 atangin MNF zawm thar mi 911 zet lawm-luh an nih thu an sawi a, Thorang bial-ah hian bial mipuiten rilru an thlak nasa hle nia sawiin, MNF zawmtu zingah hian INC lo ni thin mi 628 an tel thu leh ZPM 40, BJP 150, NPP 79 leh Neutral 14 an nih thu an sawi bawk.


Padma Shri Biakthanga lawmpuina hun hmang

Tunhnaia India President hnen atanga Padma Shri dawngtu Lalbiakthanga Pachuau chu 23rd Sector Assam Rifles chuan Inrinni khan lawmpuina hun an buatsaih a. Khatla-a Assam Rifles hmun-a he hun hman ah hian Brig. Digvijay Singh chuan sipai bang zingah hetiang chawimawina dawng thei an awm chu lawmawm a tih thu a sawi a. “Hetiang sipai bang te hnena chawimawina hlan a ni hi sipai bang te chawimawina a ni a. Thinlung takin ka lawmpui a ni,” a ti. Padma Shri dawngtu Lalbiakthanga Pachuau pawh tunhnaia Award a dawn dan te sawiin, Assam Rifles ten amah chawimawina hun an hman avangin lawmthu a sawi bawk.


Kumin ah Malaria hrik pai 4727 hmuh an ni tawh

Kumin-a thla 9 kan hman tak, January atanga September thla thleng khan Mizoram-ah mi 2,19,040 te thisen enfiah atangin mi 4727 te chuan Sikserh Malaria hri an pai tih hmuhchhuah a ni tawh a, Malaria hrik pai mi 10 in an thihpui tawh bawk a ni. State Vector Borne Diseases Control Programme (SVBDCP) chuan tunlai hian Mizorama Sikserh tamna District 3- Lunglei, Lawngtlai leh Mamit-ah te thisen endik runpui an kalpui mek bawk a ni.

Mi 43 te ex-gratia pe tawh

Mizoram-ah COVID-19 hri kai boral mi 43 te hnenah ex-gratia Rs. 50,000/- \heuh pek an ni tawh. Thudawn danin Mizoram District 11 zingah  Khawzawl tihloh District dang zawng ah ex-gratia dilna hi 300 a lut tawh a, heng a\ang hian mi 43 chu Rs. 50,000/- \heuh pek ni tawhin Lunglei leh Kolasib-ah 12  ve ve, Serchhip-ah 7, Champhai-ah 5, Mamit-ah 4 leh Saitual-ah mi 2 leh Hnahthial-ah mi pakhat te pek an ni tawh a ni.

Comments

Popular News (Last 30 Days)

Serchhip DCSO sawn a ni