Inrinni-ah COVID-19 hri kai hmuhchhuah tlahniam

Inrinni khan Mizoram-ah COVID-19 hri kai mi 387 hmuhchhuah an ni leh a, hri kai hmuhchhuah hi tlem deuh mah se Sample enfiah 3029 aatanga chhut chuan za zela 12.78 zetin hri an la kai thung a ni.

Inrinni khan ZMC-a RT-PCR Laboratory-ah Sample 482 enfiah niin heng te hi Aizawl District-a Sample lak vek a ni a, Lengpui-ah hri kai mi 19 hmuh niin a dang hi Veng leh khua 30 atanga hri kai hmuh an ni a, Veng leh khaw dang-ah hri kai mi 10 aia tam hmuhna an awm lo a ni. Fluorescent Immunoassay Test hmangin Sample 13 enfiah ni bawkin heng atang hian hri kai mi pakhat hmuh niin Aizawl khawpui chhung ami a ni.

District hrang hranga TrueNat Laboratory 7-ah Inrinni khan Sample 293 enfiah ni bawkin heng atang hian hri kai mi 24 hmuh an ni bawk a, an zinga mi 15 te chu Champhai District atanga hri kai hmuh te niin Lunglei, Kolasib leh Khawzawl District-ah hri kai mi pahnih theuh hmuh an ni a, Aizawl, Mamit leh Saitual District atangin hri kai mi pakhat theuh hmuh an ni bawk.

Inrinni khan Rapid Antigen Test hmangin Mizoram-ah Sample 2241 enfiah niin hri kai mi 269 hmuh an ni bawk a, an zinga 155 te chu Aizawl District-a hri kai hmuh te niin Chaltlang Lily Veng-ah hri kai mi 31 leh Sakawrdai-ah hri kai mi 13 hmuh an ni. Champhai District-ah hri kai mi 29 hmuh an ni bawk a, Lunglei leh Kolasib District-ah 22 ve ve hmuh ni bawkin Mamit District-ah 14, Serchhip District-ah 9, Lawngtlai District-ah 7, Hnahthial leh Saitual District-ah mi 4 ve ve leh Khawzawl District-ah hri kai mi 3 hmuh an ni bawk.

Inrinni khan Mizoram-a COVID-19 hri kai mi 389 te enkawl dam ni ve lehin nimin khan tlai dar 5:00 thlengin mi 371 te enkawl dam an ni leh bawk a, heti hian nimin tlai dar 5:00 thleng khan Mizoram-a hri kai hmuhchhuah tawh chu 1,28,604 niin an zinga 1,22,865 te enkawl dam an ni tawh a, hei hi hri kai hmuhchhuah atanga chhutin za zela 95.54 a ni a, hri kai enkawllai 5279 an la awm bawk a ni. Inrinni khan Mizoram-ah hri kai boral mi pahnih awmin nimin khan he thu buatsaih lai thleng hian boral an awmlo thung a, Mizoram-a hri kai zingah mi 460 an boral tawh a ni.