MSHCS hnuaia inenkawlna senso nuai 2 thleng bill let phalsak turin sawrkar phut

Zo People’s Movement (ZPM) Legislature Party chuan Mizoram State Health Care Scheme (MSHCS) hnuaia inziaklut mekte tan an inenkawlna senso cheng nuai 2 thlenga Bill let phalsak turin sawrkar an phut tih an sawi.

Inrinni-a thuchhuah an siam ah ZPM Legislature Party chuan Mizoram State Health Care Scheme (MSHCS) chu MNF Party in an sawrkar hmasak tuma mipuite tana thil tangkai tak an rawn chhawpchhuah a ni tih an sawi a. Thil hnawhsarum deuha tih a nih vang leh Expert recommendation ang lo deuha kalpui a nih tak hnu leh Congress sawrkar tharin a ngaihsak zui lutuk loh avang khan a nih tur ang a ni pha ta meuh lo tih an sawi a. Tuna kan sawrkar neih mek, MNF hian kum 2019 atang khan nasa taka tidanglamin, a aia tha lehzualin hma an la leh ta tih pawh sawiin, October, 2019 atang khan he Scheme a inziahluh man ah kum khat atan Rs.100/- (BPL) leh Rs.1,000/- (APL) pekin Rs. 2,00,000 thleng senso a hmuh leh theih a ni tih an sawi a. October atanga a hun chhiar thin chu sawrkar sum Calendar (April – March) anga kalpui tum a nih avangin tunah hian October, 2021- March, 2022 chhung atan Rs. 50/- (BPL) leh Rs. 500/- (APL) inziahluhna manah lak a niin Rs.1,00,000/- thleng chauh damlo inenkawlna senso a hmuh let theih dawn ta tih an sawi a ni.

ZLP chuan thla 12 atana Rs.100/- pek chu a hun pawhsei a ngaih tak avangin, tuna thla 6 atan Rs.50/500 pek chu awm an tih thu laiin damlohna senso bill let tur Rs.1,00,000/- a a tla thla erawh hriatthiam har an tih thu sawiin, “A hmaa kan pek dan nena khaikhin chuan Rs. 1,00,000/- bill-na tur chuan inziahluhna atan Rs. 25 (BPL) emaw, Rs.250 (APL) tur ni awm tak a ni a,” an ti a. “Assembly zawhna chhanna kan hmuhah MSHCS Corpus Fund hnuaiah hian cheng nuai 20,000 chuang a la awm a. Mipuite COVID-19 hripui in min tih retheih lai mek leh sum awm reng chung si a, damlote tana bill let tur a chanve-a an tihniam hi mipuite tana harsatna lian tak a ni hi kan dem takzet bawk a ni,” an ti a. Chief Minister in Assembly Session-a SEDP hnuaia damlo apiang ten an dawn tur Rs. 2,00,000/- theuh dah a nih thua sawi nen a inpersan ta hle niin an sawi bawk.

ZPM Legislature Party chuan tunah hian MSHCS hnuaiah cheng nuai 4,400 ba la pek theih loh an neih thu pawh sawiin, hei pawh hi mipuite harsatna hrethiam a, mipuite hnena pechhuak vat tura aan phut thu an sawi a. Damlote'n damdawi In an chhuahsan dawnin bill an pek tlak vek a ngai tih pawh sawiin, “MSHCS lama Bill an thehluh hian hun rei tak nghah a ngai leh si thin hi thil manganthlak tak a nih bakah mipuite phurrit belhchhahna a ni a. Damlo na/chau zualte phei chu reilote ah damdawi In lama luh an lo mamawh leh thin,” tiin tuna bill tang mek engemawzat awm, pawisa awm reng chung si a an pe thei lo chu a chhan mipuite hnena tarlang turin an phut bawk.

Comments

Popular News (Last 30 Days)

Serchhip DCSO sawn a ni