Lal Thanhawla’n chawlh a tum tawh thu a sawi

Mizoram Pradesh Congress Committee (MPCC) President leh Chief Minister tum 5 lo ni tawh, Lal Thanhawla chuan chawlh a tum tawh tih a sawi.

Aizawl-a thuthar thehdarhtu ten an kawmna ah Chief Minister hlui Lal Thanhawla chuan tuna hruaitu term kal mek (2019-2022) bak President nih a tum tawh lo tih a sawi a, kum 2023-a MLA inthlanpui neih turah pawh Candidate nih a tum tawh loh thu sawiin, “Ka chawl tawh dawn a, thangthar zawkte ka kian tawh ang. Kan Party-ah hian kei aia fel leh tha zawk an tam em em a ni,” a ti a. A banna chu Central lamah a thehluh a ngaih tur thu a sawi a, a banna hi an pawm ngei tura a ziah tur thu a sawi a. MPCC chu State dang anga AICC-in an hruaitu an ruatsak ang an nih ve loh thu pawh a sawi a, rorelna hrang nei an nih avangin central lam atangin hruaitu an rawn ruat ve ngai loh thu a sawi bawk.

Hruaitu thar chungchangah an Party-in buaina an tawh a rin loh thu sawiin Lal Thanhawla chuan, an Party kalphungah Vice Pesident apiang an President ang tih a awm lo tih a sawi a, ZPM Leader ni mek Lalduhoma chu amah thlaka MPCC President ni tur ang dawn dawna thulengvak awm thin chungchang chu a nih loh thuin a chhang bawk.

MNF sawrkar kal mek a hmuh dan sawiin, ram pumpui huap chhenfakawm thiltih lian tham la neih lo an nih thu leh mi pangngai, ram hmangaihtu tan chuan thlan chi an ni tawh lo nia a ngaih thu a sawi a. SEDP chungchang pawh sawiin, “Chhungkaw tin hnenah, NLUP lo dawng tawh te hnenah pawh SEDP cheng nuai 3 zelin kan sem ang an ti a, a nghakhlel pawl ka nih ka ring, kum 3 chhunga an tih theih loh hi kum 2 chhungin an ti thei ang em ka hre lo,” a ti bawk. (Zalen)

Comments

Popular News (Last 30 Days)

Serchhip DCSO sawn a ni