Chanchin thar thenkhat :

Lui hman tangkai dan tur sawiho

Mizoram Lui kan neih te hman tangkai theih dan tur chungchang sawipuiin Transport Minister TJ. Lalnuntluanga chuan nimin khan Inland Waterways Authority of India (IWAI) Director A. Selvakumar leh a hote chu Aizawl-a a Pisa-ah a kawm a. IWAI Director leh a hote hi Khawthlang-tuipui/Tuichawng lui hman tangkai a nih theihna tura hmalakna zelah Site Inspection nei tura rawn kal niin Mizoram lui liante mipuiten an hman tangkai theih tura sawrkar hmalakna chu a theih ang anga tawiawm an inhuam thu an sawi a. Khawthlangtuipui/Tuichawng lui hman tangkaina tur DPR pawh Ministry of Shipping in pawmpui tawhin tender pawh tihfel vat beisei anih thu an sawi a. Khawthlangtuipui/Tuichang lui bakah hian Inspection Team te hian Tlawng lui an endik nghal bawk a, Declared National Waterway 102 a nih angin Mizoram Sawrkar in proposal a siam te an bawhzui reng thu an sawi bawk.


Lunglei-ah Project kalpui

Lunglei District Bawrhsap Kulothungan A hmalakna in ‘Mipui hnenah kal rawh-Go ti the People’ tih project chu Lunglei District-ah kalpui chhoh mek a ni a, he hmalakna in a tum ber chu District mipui, a bik takin thingtlang khaw kilkhawr zawka cheng te sawrkar Scheme hrang hrang te hrilh hriata, application thehluh tul te a hmuna tihfel pui a ni a. Tun thla tir atang khan Lunglei DC Office Staff-te chu khaw hrang hrangah kalin hemi bawhzui hian hma an la a ni.


Draft E. Roll tarchhuak

Lawngtlai District chhunga Lai Autonomous District Council (LADC) hnuaia Village Council pali leh Chakma Autonomous District Council (CADC) hnuaia Village Council paruk a bye-election buatsaih tura hman tur Draft Electoral Roll chu nimin khan Lawngtlai-ah tlangzarh a ni a. Nimin vek khan AMC huamchhunga Local Council 5- Armed Veng, Laipuitlang, Tui-thiang, Venghnuai leh Zemabawk-a bye-election neih tur atan Draft Roll tarchhuah a ni bawk.


Lawngtlai DISHA thukhawm

Lawngtlai District Development Co-ordination and Monitoring Committee (DISHA) thut-khawm chu nimin khan neiin sawrkar laipui sum hmanga an District chhunga hmalakna hrang hrang te thlirho a ni a. He thutkhawm hi an Chairman leh Lok Sabha MP C. Lalrosanga chuan biakhmuhtheihna hmangin a kaihruai a ni.


Restricted Area-ah puang

Tunhnaia COVID-19 hri kai thahnem tak hmuhna, Serchhip District-a Thentlang khua chu Nov. 11, 2021 tlai dar 5:00 atang khan Serchhip District Bawrhsap chuan Restricted Area-ah puangin inkharkhipna kalpui a ni a. Thentlang khua ah hian hri kai mi 72 hmuh ni tawhin 65 dam tawhin enkawllai 7 an la awm a ni.

Comments

Popular News (Last 30 Days)

Serchhip DCSO sawn a ni