Pneumonia vanga thihna titlem tura hmalakna Programme Serchhip-ah a hawnna neih a ni

Naupang kum 5 hnuailam zinga Pneumonia vanga thihna ti tlem tura beihpui thlakna programme, Social Awareness and Actions to Neutralize Pneumonia Successfully (SAANS) chu nimin khan Mizoram hmun hrang hrangah hawnna neiin Serchhip-ah pawh he Programme hi hawngin AHSH te hmalak dan tur inhrilhfiahna neih nghal a ni.

Serchhip District-a SAANS hawnna hun Serchhip Press Club-a neih hi National Health Mission (NHM)-a Serchhip District Programme Manager (DPM), Deborah Vanlalchhuangi chuan kaihruaiin he hun hmanpuitu Serchhip CMO Office-a Head Assistant C. Vanlalauva chuan Pneumonia vanga nausen thihna ala tam em em laia nakum February thla thlenga kalpui tur hetiang beihpui thlakna hman a ni chu lawmawm a tih thu leh he hmalakna hian kan District ah rah tha a chhuah ngei a beisei tih a sawi a. Hemi atana thawktu zawng zawngte chu theihtawp chhuah turin a chah bawk.

He hunah hian Serchhip District Hospital-a Paediatrician, Dr. K. Vanlalhriati chuan Pneumonia chungchang sawifiahin tun thlengin India ramah Pneumonia chu naupang kum 5 hnuailam thihna thlen nasa tu ala ni tih sawiin, kumtin khawvel pumah naupang maktaduai 55 in he natna hi an vei thin a, an zinga maktaduai 1.6 in an thihpui tih sawiin, India ramah pawh kumtin naupang mtd. 30 velin an la vei ziah thu leh heng zinga za zela 10 te phei chu ngaihtuah nasat ngai an nih bakah kumtin nausen piang 1000 zela 5.1 te chu Pneumonia vanga an la thih thu a sawi a. Hetiang zat kumtin an la thih avang hian SAANS hmalakna hian kum 2025-ah chuan Pneumonia vanga nausen thihna hi nausen piang 1000 zela 3 aia hniama tlakhniam tir chu a tum a ni tih a sawi.

Dr. K. Vanlalhriati chuan he huna tel ASHA te chu nausen damlo te Doctor hnen panpui an nih hmaa lo buaipui hmasa tu an nih avangin he natna chungchang an hriatchian a pawimawh thu a sawi a. Pneumonia kai naupangte chu an taksa ah lanchhuahna dang nei lo mah se an thawk ran dan a zira hriat theih a ni tih sawiin minute khat zela thla 2 hnuailam ah vawi 60, thla 2 atanga kum khat ah vawi 50 leh kum 1-5 ah vawi 40 a tlin chuan Pneumonia a ni tih a sawi a. Tunah chuan Pneumonia laka nausen an him theihna turin vaccine siam a nih tawh thu leh hei hian zaa za in nausen hi veng lo mah se engemaw chen a ven theih avangin vaccine lak chu ngaih pawimawh a tul thu a sawi bawk a ni.