Nakum February-ah ASF laka fihlim theih beisei

AH&Vety Department chuan Mizoram-a Vawk hri leng mek, African Swine Fever (ASF) lakah nakum February thla ah chuan fihlim an beisei tih an sawi.

AH & Vety Department hotute chuan Mizoram-a ASF hri leng mek chu a ziaawm hret hret tih sawiin, February, 2022-ah chuan a nih ang ang a nih tawh an beisei tih sawiin, hemi hnu lamah chuan hri kai hmuhchhuah pawh awm mah se hmuhchhuah zeuh zeuh chauh a nih tawh an beisei tih an sawi a, ASF chuan Mizoram a chenchilh tawh dawn niin sawi mah se nasa taka thihna thlen ang chi chu a awm tawh lo turah an ngai tih an sawi a ni.

ASF vang hian kumin March thla khan Lungsen khua ah Vawk thi awmin Mizoram-a ASF vanga Vawk thi finfiah hmasak ber a ni a, hemi hnu hian Vawk thi awm belh zelin tun thlengin Vawk 29,726 an thi tawh a, District 11-a khua 271-ah he hri hi hmuh a ni tawh bawk a. ASF rinhlelh vanga thi hi Vawk 533 awm tawhin ASF vanga vawk suat tawh zawng zawng chu 10,380 an tling tawh a. Hri len hnua a tum hnihna atan Inrinni khan ASF vanga Vawk thi hi Mizoram-ah a awm lo leh bawk a ni.