Kum 2016 atanga 2020 chhung-n Mizoram-ah Cancer vanga nunna chan mi 4638 an awm

Mizoram Population Based-Cancer Registry (PB-CR)-in a chhinchhiah danin, kum 2016 atanga kum 2020 (kum li) chhung khan Mizoram-ah Cancer vanga thi mi 4638 an awm a. Kum 2019 atang khan kum khat-ah Cancer vanga thi hi mi sang khat aiin an tam a ni.

Mizoram Population Based-Cancer Registry (PB-CR) Principal Investigator Dr Eric Zomawia sawi danin, kum 2016 atanga kum 2020 inkar ah khan Mizoram-ah Cancer natna vei mi 8663 an awm a, kumin kum kal mekah Cancer vei thar mi 831 an awm leh tawh bawk a ni. Kum 2016 atanga tun thlenga Cancer vei an chhinchhiahna atanga a lan danin, Cancer veite hi kumtin Hmeichhia aiin Mipa an tam zawk zel a, Mipa zingah Pumpui Cancer, Hrawk Cancer, Chuap Cancer, Chawkawng Cancer leh Thin Cancer te chu a hluar pawl niin, Hmeichhia ah chuan Hnute Cancer, Chhul Hmawr Cancer, Chuap leh Pumpui Cancer te chu a hluar zual an ni.

PB-CR chhinchhiahna atanga a lan danin, kum 2016 atanga kum 2020 inkar chhunga Cancer vei hmuhchhuah tam ber kum chu nikum 2020 kha niin, Cancer vei thar 1846 an awm a, kum 4 chhunga Cancer vanga nunna chan tam ber kum pawh nikum tho kha niin, Cancer vanga boral hi mi 1087 an awm bawk a. Cancer vang hian kum 2018 hmalam ah khan mi sang khat thi tling ngailo mah se kum 2019 atang chuan kum khat chhungin mi sang khat aia tam an thi tawh a ni.

Dr. Eric Zomawia chuan, Mizoram PB-CR chu kum 2003 atang khan ICMR hnuaiah Aizawl Civil Hospital-ah din a ni tih sawiin, a tum ber chu Mizoram a Cancer hluar dan awmze nei taka zirchian leh chu hriatna chu Cancer natna do nan leh enkawl nana hman a nih thu a sawi a. Cancer natna veite chu PBCR-ah inziah-luh ngei tur a nih thu leh Mizoram sawrkar pawhin hriattirna a tihchhuah tawh thu sawiin, damlo te chanchin chu pekchhuah phal a nih loh thu a sawi bawk.