Hri kai 92.49% dam tawh

Serchhip District-a COVID-19 hri kai hmuh tawh atanga za zela 92.49 te chu enkawl dam an ni tawh.

Serchhip District-ah hri kai hmuh an pun ve zel laiin enkawl dam pawh an pung ve zel a, Inrinni khan mi 58 te enkawl dam niin nimin khan mi 19 enkawl dam an ni leh bawk a, heti hian nimin thleng khan Serchhip District a hri kai hmuhchhuah atanga chhutin za zela 92.49 te enkawl dam an ni tawh a ni.

Serchhip District-ah hian hri kai hmuh-chhuah la pung ve zelin, Zirtawpni khan TrueNat Laboratory atangin hri kai mi 13 hmuhchhuah awmin an vaiin Serchhip khawpui chhung ami an ni a, Rapid Antigen Test hmangin hri kai mi 53 hmuh an ni bawk a. Inrinni khan Rapid Anti-gen Test hmang hian hri kai mi 9 hmuh belh an ni bawk a, nimin khan hri kai mi 6 hmuh belh leh an ni bawk.

Nimin tlai dar 3:58 khan Zamliani (72), w/o Upa C. Petera (L), Serchhip Hmar Veng chu COVID-19 vangin DCHC Serchhip-ah a boral ve leh bawk a, October ni 30, 2021-a hri kai hmuhchhuah niin DCHC Serchhip-ah enkawl nghal a ni a, natna dang nei niin a ruang hi lumen a nih a nih hnuah Vawiin hian vuiliam a ni ang.

Heti hian nimin tlai thleng khan Serchhip District-a hri kai hmuhchhuah chu 4758 an ni tawh a, an zinga 4401 chu enkawl dam ni tawhin hri kai enkawllai 342 an la awm a, hri kai te zingah mi 15 an boral tawh bawk a ni.