Serchhip bialtu MLA Lalduhoma chuan a bial chhunga hmasawnna hnathawh tha taka a kal theih nan tlawmngai pawl te nen en ho thin a duh thu sawiin, hemi kawnga Serchhip Sub-Hqrs. YMA Vigilance & Monitoring Committee hmalakna chu tha a tih thu leh entawntlak a tih thu a sawi.
Tunhnaiah New Serchhip VC Area-a CO-VID-19 hri kai hmuhchhuah an pun zel avanga Serchhip District Bawrhsap in Oct. 21, 2021 atanga New Serchhip South VC Area, Pioneer Camp hnunglam hmun thenkhat Restricted Area ah a lo puan tawh chu Contract Tracing tih zawh a nih tawh avang leh hri kai te pawh an dam tak avangin Oct. 29, 2021 tlai dar 5:00 atangin Restricted Area-a puan a nihna chu hlih leh a ni.
Cricket Association of Mizoram (CAM) buatsaih Mizoram-a Cricket inelna awm zinga sang ber, Presidents Cup chu karleh Thawhtanni, Nov. 1, 2021 khian Sihhmui-ah khelh tan a ni dawn a, Cricket Association of Serchhip District (CASD) pawhin Team tirh tumin inbuat-saihna an kalpui mek a, tunah hian Player thlan fel ni tawhin an match hmasa berah Ramhlun Venglai chu karleh Thawhlehni zing dar 9:00 khian an hmachhawn dawn a ni.
Serchhip District-ah a zawn-a ni 2 chhung ASF vanga Vawk thi a awmloh hnuah nimin khan Thentlang khua ah Vawk thi pakhat a awm leh a, Thentlang khua ah hian ASF vangin Vawk 29 lai a thi ta a, heng te nen hian Serchhip District-ah ASF vangin Vawk 3836 lai a thi tawh a ni.
Serchhip Chanmari Branch YMA chuan nimin khan Serchhip Blood Bank-a dah turin a thlawnin thisen an pe a, thisen petute hi mipa 16 leh hmeichhia 6, an vaiin mi 22 an pe a, heng mi tlawmngai te hi Blood Bank-ah kalin thisen hi an pe a ni. Serchhip Blood Bank-ah hian thisen mamawhna a san avangin thisen dah khawl sa a awm hman meuh lo nia thudawn a ni.
Serchhip District-a kuthnathawktute Vaimim tharchhuah te chu tunlai hian a fang mal-a nuaithlak sa in Agriculture Department chuan FOCUS hnuaiah kg-ah Rs. 20 in an lei sak mek.
Mi thenkhat ten Serchhip-a mimal pakhat hnena a pung um-a sum an dahkhawm chungchanga harsatna thleng chu Serchhip Police ten hun engemaw chen an buaipui hnuah sum dahtu (Depositor) te duhdan angin thubuai siam lova tihtawp a ni a, heng mite sum hi an dahna te hian kum 7 chhunga rul turin intiamkamna ziah a ni thung.