Best Tourism Village-ah Reiek thlan a ni

Nimin-a ‘World Tourism Day’ lawmna New Delhi-a neih ah Reiek (Mizoram) khua chu India rama Tourism Village tha ber, ‘Best Tourism Village of India 2023’ atan puan niin Gold Award hlan an ni a, Gold Award dawng thei India ram pum atanga thlanchhuah Village tha ber panga zingah a tel a ni.

World Tourism Day lawmna hi Bharat Mandapam, New Delhi-ah neih niin Best Tourism Village hi Ministry of Tourism hnuaia Central Nodal Agency for Rural Tourism in a buatsaih niin Best Tourism Village thlanna Competition-ah hian ramchhunga Staet 31 leh District 315 atangin application 750 chuang a lut a, he chawimawina hi Tourism Minister Robert Romawia Royte chuan Union Tourism Secretary V. Vidyavathi hnen atangin a dawng a ni.

Best Tourism Village Competition hi kumin February ni 16, 2023 khan Ministry of Tourism chuan hawng tanin Online Portal-ah application hi thehluh a ni a. Stage hrang hrang paltlangin September thla tir khan khaw tha zual 80 thlan a ni a. Heng thlanchhuah khuate hi National Evaluation Committee hmaah Powerpoint Presentation pek a ni a. Video clip te siamin thehluh a ni bawk a. A tawpah a titha zual khaw 35 thlanchhuah niin Gold, Silver leh Bronze te pek an ni a. Hetah hian Reiek khua hi a sang ber, Gold Award la thei panga zingah a tel ta a ni.

He Award dawng thei tur hian tehna (evaluation parameters) hrang hrang Sustainable Development Goal te nena inzawm tlat pakua hman a ni a, chung te chu Cultural and Natural Resources, Economic Sustainability, Environmental Sustainability, Governance and Prioritization of Tourism, Health, Safety and Security, Promotion and Conservation of Cultural, Development of Social Sustainability, Tourism Development and Value Chain Integration, and Infrastructure and Connectivity te a ni.