Latest News

Mizoram Journalist Pension Scheme siam thar Council of Minister thukhawm in an pawm

Nimin-a Chief Minister Zoramthanga hova Council of Ministers thukhawm chuan hun rei tak atanga MJA in an lo buaipui leh tum hnih lai Sawrkara an lo thlen tawh Journalist pension Scheme chungchangah 'The Mizoram Journalists’ Pension Scheme 2023' chu hman theih turin an pawmpui ta.

Nimin-a Council of Minister thutkhawm ah hian he ruahmanna chungchang sawihawngtu I&PR Minister Lalruatkima chuan Journalist Pension Scheme chungchanga MJA dilna hi kum 5 aia a tam tawh thu sawiin, thenawm State Assam, Tripura leh Manipur-ah te hetiang hamthatna hi chanchinbumite hnenah pek a ni nih mek thu leh India State dang tam takte pawhin hetiang hi an neih ve thu te a sawi a. Assam leh Tripura chuan thla tin Rs. 10,000/- an pek mek thu sawiin, khawtlang leh ram leh hnam tana an lo thawhna leh inpekna te ngaihtuahin MJA in a dil hi awm a tih thu a sawi a ni.

MJA te hian kum 2019 leh kum 2021-ah te Mizoram Sawrkar ah chanchinbu mite tan a hminga Pension ang, tanpuina pek theih dan ruahmanna an duan te an lo thehlut tawh a. Heng ruahmanna pahnih te hi Sawrkar din Study Team ten lo zirchiangin rawtna te an siam a, an rawtna te chu tum engemawzat sawiho a nih hnuiin tunhnai khan a Scheme ruangam chu peihfel niin nimin-a Cabinet Meeting a sawiho turin thu chhawpchhuah zinga a telh a ni a, 'The Mizoram Journalists’ Pension Scheme 2023' chu lungrual taka pawm a ni ta a ni.

He Scheme duanchhin ang chuan chanchinbu mi leh thuthar thehdarhtu, MJA member ni bawk kum 60 tling tawh leh chanchinbu leh thuthar thehdarhna kawnga chum lo chat lova kum 30 lo thawk te chuan he hamthatna hi an dil thei dawn a, thla tin Rs. 8500/- chu pension angiin tanpuina sum an dawng thei dawn a ni. Family pension angin chhawm emaw, a latu in a boralin an nupui fanau ten an la thei dawn lo thung a. Kum 60 an tlin hmaa natna khirh – Cancer, Lung zai leh Taksa peng thenkhat thlak (organ transplantation) an tawh palhin he hamthatna dawn an dil thei ve dawn thung a ni. He hamthatna latute hian pension dang eng chi mah an la thei dawn lo a. Chu bakah, an hna hi an chawlh ngei ngei a ngai dawn a, chanchinbu mi anga hamthatna dang an dawn mek te pawh an dawng zui thei dawn lo bawk a ni.

Mizoram District hrang hranga MJA member ni mek mi 190 bawr atangin he ham-thatna dawng thei hi tun dinhmun ah mi 23 bawr vel awm mahse thuthar thehdarhna kawnga an hnathawh an chawlhsan a ngaih avang leh chanchinbu mi anga hamthatna dang an dawn mek te a tawp vek dawn avangin a takah chuan mi 4/5 bakin an dil a rinawm loh a. Serchhip District a MJA member mi 14 zingah dil thei hi mi pakhat chiah an la awm thung a ni.

Comments

Popular News (Last 30 Days)