Aizawl khawpui hmarlam chawmna atan 37 MLD Water Treatment Plant hawn thar a ni

Aizawl khawpuia cheng ten tui thianghlim hnianghnar zawka an hmuh belh theihna tura hmalakna, ‘Augmentation of Aizawl Water Supply and Construction of 37 MLD Water Treatment Plant’ chu nimin khan PHE Department changtu Deputy Chief Minister Tawnluia chuan a hawng.

PHE Complex, Laipuitlang-a ‘Augmentation of Aizawl Water Supply and Construction of 37 MLD Water Treatment Plant’ hawnna hunah hian Deputy Chief Minister chuan Aizawl khawpui chawmtu tui lakna belhchhah tura ngawrh taka hmalakna hawn a ni ta chu lawmawm a tih thu a sawi a. Kum tam tak Aizawl khawpui tui a chawmtu Greater Aizawl Water Supply Phase I leh II in mal khalh tak leh indaih lo taka Aizawl khawpui a chawm thin chu he Plant thar hian nasa takin a puih tur thu a sawi a. He Scheme hi sawrkar hmasa atanga bultan a nih dan leh sawrkarna inthlakah pawh chhunzawm zela a hlawhtlinna hmuh a ni ta chu lawmawm a tih thu a sawi bawk.

Deputy Chief Minister chuan khawpui thang zelah tui mamawhna a sang tial tial tih pawh sawiin, mamawhna phuhruk tura hmalak a nih rual hian tui hnar a tlem zawnga kal loh a, kan tui hna te humhalha chhuan lo awm leh zel tur ngaihtuah chunga hmalak tel a pawimawhzia a tarlang a. Chumi avang chuan State Legislative Assembly Session-ah River Protection Bill putluh a pass a nih tak thu te pawh a sawi bawk.

37 MLD Water Treatment Plant Project hi September ni 22 atanga 24 chhung khan Diesel engine hmangin hlawhtling takin Trial Run neih a ni a. He Trial Run-ah hian Diesel Engine lian 1475 HP hmangin tui thianghlim Laipuitlang Zemlianah pump thlen a ni a. Tun dinhmunah Sub-Station leh a Electric hmanga pump-na tur bunfel a ni tawh bawk a, Sihhmui atanga 33/11 kV power supply line pawh ngawrh taka hnathawh leh enchhin mek a ni. State Investment Program Management and Implementing Unit (SIPMIU), UD&PA Department chuan kum 2016 atang khan he Project siamin bul an lo tan chho tawh a. Greater Aizawl Water Supply, Phase I leh II khuahna thlang lam Tlawng lui dung KM riat (8)-a hla Mualkhang Tanhril ramah 37 MLD Water Treatment Plant thar hi sak a ni a. Heta tang hian Laipuitlang Zemlian-ah tui tih thianghlim sa hi Rising Main (pipe lian tak, feet hnih leh a chanve hawltlang a lian), kilometer sawmpakhat (11) zeta thui hmanga pump chhoh a ni.

He Project hi nitin tui litre maktaduai 37 pump lut thei tura ruahman a ni a, India rama khawpui lian a cheng ten an dawn thin ang nitin mi pakhat tan tui litre 135 anga sem theih tura ruahmanna siam a ni a, chu chuan kum 2033 thleng mipui 4,45,000)a chawm zo dawn a ni. SIPMIU in khawpui chhung tuam chhuaka pipeline thar leh lian a phum tawh te, Zonal Tanky thar an sak te chuan tangkai zawkin mipuiah tui sem a ti awlsam tawh dawn a ni.

Comments

Popular News (Last 30 Days)

LPG man bithliah thar