Serchhip-ah Swachhata Hi Seva 2023 hawnna leh 15th Finance Commission inhrilhfiahna neih a ni

Swachh Bharat Mission-Gramin (SBM-G) hnuaia Faina beihpui kalpui mek Swachhata Hi Seva 2023 hawnna chu Zirtawpni khan Serchhip District-ah neih a ni a, he hunah hian Serchhip District chhunga Village Council President leh Secretary te tan 15th Finance Commission chungchang inhrilhfiahna hun hman nghal a ni bawk.
Serchhip DC Conference Hall-a Swachhata Hi Seva 2023 hawnna hun hi District Coordinator Samuel Lallawmzuala chuan kaihruaiin Swachhata Hi Seva awmzia leh a thiltum bakah 15th Finance Commission chungchanga training buatsaih a nih chhan te a sawifiah a, Serchhip District Addl. DC James Lalnithanga chuan Swachhata Hi Seva 2023 hi hawngin, Faina beihpui thlakna kal mek Serchhip District-a bawhzui tura hawnna neih a ni leh hemi ruala 15th Finance Commission chungchanga training buatsaih a ni chu lawmawm a tih thu a sawi a, training a lo kal zawng zawng ten hlawk taka an hman theuh a beisei thu a sawi a ni.

He hunah hian UD&PA Department-a DUDO Gaston Vanlalhriatpuia chuan Swachhata Hi Seva 2023 chu khawpui chhungah pawh UD&PA hmalakna in kalpui mek a nih thu sawiin, Town chhunga VC zawng zawngte chu Faina beihpui thlak mekah theihtawpa tan la turin a sawm a. 15th Finance Commission 2021-2022 Tied Grant-a hmalak tawh chin te a tarlang bawk a. District Project Manager V. Lalnuntluanga chuan ‘15th Finance Commission Geo-tagging’ chungchang leh hna felfai zawka kalpui a nih theih dan tur zirtirin PHE Serchhip WATSAN Division-a Executive Engineer, Er. Isaac Lalchhuanmawia chuan ‘Operation and Maintenance & Sewage Management’ chungchangah zirtirna a pek bakah 15th Finance Commission Tied Fund (Water & Sanitation) chu PHE Department te chan anih angin VC te’n PHE Department lam nena thawhhona neih that a pawimawh thu a sawi a. Er. Samuel LR. Ralte, Sr. SDO PHE Department, Serchhip chuan ‘Disinfection of Water by Bleaching Powder’ tih thupui hmangin kalkhawmte zirtirna a pe a, Bleaching powder hman dan tur te chipchiar takin PowerPoint Presentation hmangin a sawifiah a, VC kalkhawm zawng zawngte’n tangkai taka an hman turin Bleaching Powder (Package khat) theuh hlan an ni bawk.

He Training-ah hian Serchhip District chhunga Village Council President leh Secretary (Rural leh Urban area) te telin Urban/Town VC atangin mi 26 leh Rural VC atangin mi 72 an tel a, zawhna leh chhanna hun hman nghal a ni bawk.