Grand Gandhi Jayanti Exhibition neih tur sawifiah

Commerce & Industries Department changtu Secretary R. Lalramnghaka chuan nimin khan Aizawl Press Club-ah thuthar thehdarhtute kawmin Grand Gandhi Jayanti Exhibition neih tur chungchang a sawifiah.

Mizoram Governor Dr. Hari Babu Kambhampati-a ruahmanna angin, October ni 2 atanga ni 4 chhung hian India Hnam Pa, Mahatma Gandhi piancham denchhenin Raj Bhawan-ah ‘The Grand Gandhi Jayanti Exhibition’ hi buatsaih a ni dawn a, Grand Gandhi Jayanti Exhibition hi Governor Secretariat leh Commerce & Industries Department buatsaih tur niin, Mizo siamchhuah Handloom leh Handicrafts thil chi hrang hrang lei tur a awm dawn bakah ei tur tuihnai chi hrang hrang lei theih turin Food Court ruahman a ni bawk a. Mizoram Governor chuan Exhibition tlawh tur hian mitin te sawmin, Exhibition tlawhtute'n tualchhung thilsiam an phochhuah te hi lei theuh turin a ngen a ni.

Exhibition-in a tum ber chu Mahatma Gandhi-a'n mahni tualchhung siamchhuah hmanga intodelh a, ramchhung thil siamchhuah te a tam thei ang ber hman pawimawh a tihzia leh tualchhung siam chhuah thil chi hrang hrang uar chhunzawm zel a tulzia tihlanna tur a ni a. Zzng dar 10:00 atanga zan dar 7:00 thleng neih thin a ni ang.