Latest News

Kawlphetha MW 10 pechhuak thei tur Thenzawl-a Solar Power plant siamna hmun tur enfiah

Kawlphetha MW 10 pechhuak thei tur Thenzawl ram Phivawk tlang-a Solar Power Plant siamna hmun tur chu nimin khan P&E Minister R. Lalzirliana chuan a hmunah tlawhin hnathawh dan turte a enfiah.
Thenzawl ram Phivawk tlang-a Solar Power Plant hi NABARD Loan cheng Vbc. 74.82 senga siam tur niin kawlphetha 10 MW pechhuak thei tur a ni dawn a. Nizung chakna hmanga kawlphetha siamchhuahna, Grid Connected Solar SPV Power Plant hi kum 2 chhunga thawh zawh tum a ni. Nimin-a helai hmun a tlawhna ah hian Power Minister R. Lalzirliana chuan Power and Electricity Department hotute hruaiin Solar Plant panna tur kawng laih thar dan tur leh a hmuna 132 kV Sub-Station bunna hmun turte enin ruahmanna a siampui a. Phivawk tlang-a Solar Power Plant siamna tur hmun hi bigha 30 vela zau niin, Solar Plant bik hnathawktu tur Contractor pawh thlan fel a ni tawh a. A panna kawng laih leh 132 kV Sub-Station bun hna hi P&E Department in an thawk dawn a ni.


He Power Plant hi siam zawh a nih hun chuan helai hmun atanga kawlphetha siamchhuah chu State ta tur liau liau a ni dawn tih Power Minister chuan a sawi a. Kawlphetha hi mitin mamawh, a loa awm theih loh a nih avangin Power Supply hnianghnar neih hi kan mamawh em em a, sawrkar chuan kawng hrang hranga tan lain, Thenzawl bakah hian Sumsuih ram ah MW 5 pechhuak thei tur Solar Plant thar bun tura ruahman mek a nih thu a sawi bawk.

P&E Minister hian nimin vek khan Thingsulthliah hmuna 132/33kV Sub-Station hmun tur pawh a tlawh nghal a. Special Assistance hnuaiah cheng nuai 300 hmanga he hna hi thawh tur niin Fund allocation hmuh a nih hnuah Expenditure Sanction dil mek a nih thu Minister chuan a sawi. He Sub-Station ah hian Aizawl-Lunglei 132kV line awmsa hmangin Thingsulthliah khaw bulah Power lakluh ani anga, 33kV Level in chhim leh hmar-ah Power pekchhuah anih tur thu a sawi bawka. Hna hi thawh tan tawh niin Sub-Station Levelling hna thawh zawh tawh a ni a. Hna hmabak pawh chak taka tan chhoh tur a nih thu a sawi bawk.

Nimin-a helai hmun a tlawhna ah hian P&E Minister hi P&E Department-a Engineer-in-Chief Er. Lalhmingliani Hmar leh Superintending Engineer, Works-I Er. Lalzorama; Superintending Engineer, Project Circle-II Er. R. Lalrinkima leh sawrkar mi pawimawh dang te bakah Serchhip atangin P&E Department hotute chuan an tawiawm a ni.

Comments

Popular News (Last 30 Days)