Latest News

South Tuipui bial-ah Health Minister in a hawng

Health Minister Dr. R. Lalthangliana chuan nimin leh niminpiah ah te khan a Bial chhung khaw thenkhat tlawhin sawrkar hmalakna hnuaia hnathawh thenkhat a hawng.

Dr. R. Lalthngliana hian nimin khan World Bank sum cheng nuai 397 seng a sak Hnahthial Chief Medical Officer’s Office building chu nimin khan a hawng a, District tihpuitlinna kal zelah Hnahthial District in Chief Medical Officer’s Office building a nei ta chu lawmawm a tih thu sawiin, District tan thil chhinchhiahtlak tak a nih thu a sawi bakah District CMO leh a thawhpuite leh Hnahthial mipuite a lawmpui thu a sawi bawk. Hnahthial Chief Medical Officers (CMO) Office Building hi Lushai Engineers te sak niin December ni 17, 2021 khan sak tan a n a,. Mizopa chhiara chhawng li a sang a ni.

Dr. R. Lalthangliana hian Hnahthial Electric Veng-a cheng nuai 43 senga sak District Research Officer (DRO) leh Staff Quarters building sak thar te chu niminpiah khan a hawng bawk a, District anga a function tak hnuah Hnahthial chuan hmasawnna nasa tak a hmuh thu sawiin, District in a kentel Office tam tak hawn a nih tawh thu leh District Institute of Education & Training (DIET) te, Rawpui-a Kendriya Vidyalaya Sangathan (KVS) te ruahman a nih thu a sawi a. Office la hawn loh langsar zual District Transport Office leh District Local Administration Office te hawn thuai a nih theih nan hmalak mek a nih thu a sawi bawk.

Jal Jeevan Mission (JJM) hnuaia cheng 421,36,000 senga siam Darzo Solar Pumping Scheme pawh niminpiah khan bialtu MLA hian a hawng bawk a, he tuilakna hi February 2022 a siam tan niin nitin tui litre 1,44,000 pump chhuak thei tura ruahman a ni a. Darzo khua in a mamawh tak, tui hnianghnar tak an neih theih nana nizung chakna hmanga tui pump na (Solar Pumping Scheme) hawn a ni ta chu a lawmawm hle tih a sawi a. Ram leilung hausakna pawimawh tak ramngaw ti cheureu lova tui pump khawl tha tak an nei chu ropui a tih thu sawiin, Darzo khawtlang tan thil chhinchhiahtlak tak leh hmasawnna ropui tak a ni, a ti bawk.

South Tuipui bialtu MLA ni bawk Dr. R. Lalthangliana hian nimin khan Hnahthial Chanmari Branch YMA ten an kum 50-na, Golden Jubilee an lawmna hun chu khuallian niin a hmanpui bawk a, Jubilee hriatrengna lungphun hawnna neiin Souvenir a tlangzarh bakah Chanmari Branch YMA Hnahthial in kum 50 a tlin lawmna pualin Chanmari-ah Health Clinic din phalna lehkha ziak leh thilpek a hlan nghal a ni. Hei bakah hian Dr. R. Lalthangliana hian ni 2 chhung awh tur Hnahthial District Basketball Association (HDBA) buatsaih MLA Cup Basketball Tournament hawnna chu niminpiah tlai khan hmanpuiin Hnahthial District Village Council Association (HDVCA) Conference chu a hmanpui bawk a ni.

Comments

Popular News (Last 30 Days)