Super Specialty Cancer & Research Centre lung phum

Japan International Cooperation Agency (JICA) sum cheng vbc. 700 senga Mizoram State Super Specialty Cancer & Research Centre sak tur lungphum chu nimin khan Chief Minister Zoramthanga'n a phum.

Mizoram State Cancer Institute, Zemabawk-a Super Specialty Cancer & Research Centre sak turah hian khum 200 awmna Hospital awmin, Cancer natna enkawlna khawl tha ber bera thuam tur a ni a, a sakna senso cheng vbc. 700 atanga za zela 20 chu Mizoram sawrkar tum ve tur a ni ang a, kum 2028 kumtawp lama sak zawh hman beisei a ni.

Chief Minister Zoramthanga chuan, he Research Centre hian Cancer natna hluarna Mizoram a harsatna nasa taka a sutkian theih a beisei tih a sawi a, hetiang din a nih theih nana tanpuitu Japan sawrkar leh JICA chungah lawmthu a sawi a. Cancer enkawlna tha leh changtlung tak nei mah ila a pawimawh zawk chu Cancer Hospital luh ngai lo tura inbuatsaih a nih thu a sawi bawk.