Kum 4 tang turin chungthu rel

Cheng nuai 179 tih chingpen thubuaia Court in thiamloh a chantir Chakma Autonomous District Council (CADC)-a Chief Executive Member (CEM) hlui Kali Kumar Tongchangya chu kum 4 lung In tang tur leh cheng nuai 4 chawi tura hrem a ni.

CADC in kum 2009 atanga 2013 chhunga Non-Lapsable Central Pool of Resources hnuaia Longpuighat leh Kukurduleya khaw inkar kawng siamna tur cheng nuai 1129 chuang a dawn atanga cheng nuai 179 chuang khawih chingpena puh, Kali Kumar Tongchangya hi niminpiah khan Aizawl District Court Special Judge (Prevention of Corruption Act) Dr. HTC. Lalrinchhana chuan thiamloh a chantir tawh a, nimin khan a hremna puangin kum 4 lung In-a tang tur leh cheng nuai 4 chawi turin a hrem a a ni.

Kali Kumar Tongchangya hi Section 409 of IPC hnuaiah kum li (4) thleng lung In tang tur leh cheng nuai hnih chawi tura hrem niin pawisa chawitur hi a pe theilo a nih chuan kum khat thleng lung In tan belh tura tih a ni a. Section 13 (2) of the PC Act, 1988 hnuaiah kum li thleng lung In tang tur leh cheng nuai hnih chawi tura tih ni bawkin, pawisa chawitur hi a pe theilo a nih chuan kum khat tan belh tura tih a ni bawk a. Amaherawh chu kum upa a nih tawh bakah a sum khawih chingpen hi mimal tana hmang a nih loh avangin a hremna pahnih chu hmun khatah kalkhawmtir niin kum 4 tang tur leh cheng nuai 4 chawi tura tih a ni a, pawisa chawi tur hi a pe thei lo a nih chuan kum 2 a tan belh leh dawn a ni.

CADC CEM hlui Kali Kumar Tongchangya hi CEM a nih lai leh Chakma District Congress Committee President a nih laiin, CADC chhung hmasawnna hnathawh tur sum cheng nuai 179.3773 chu khawih chingpenin, inthlan campaign nan leh an party hmunhma dinna atan a hmang tih ACB chuan an chhui chhuak a, pawisa khawih chingpen zinga cheng nuai 126 chu man let niin, Court chuan pawisa man let chu sawrkar sumbawm a dah nghal turin thupek a siam tawh bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar