Lalduhoma’n an telh loh chhan a lang ta niin ngai

ZPM Leader Lalduhoma chuan Lok Ayukta Chairman ruat na tur bik chauha amah telh duh lohna chhan chu a lo lang ta niin a sawi.

Nimin a thuchhuah a siamah ZPM Leader Lalduhoma chuan Mizoram-ah sawrkar thuhnuaia awm lova lai taka rorel thei tur nihna sang tak tak - MPSC Chairman leh Secretary tur te, Lok Ayukta Chairman leh Secretary tur te leh Chief Information Commission leh a member turte ruattu tur bik Selection Committee din a ni thin tih sawiin, chu Selection Committee-ah chuan sawrkar dinglai ten an mi duh zawng leh an sangawizawnpui theih tur mihring an dah mai mai lohna turin Opposition Leader chu a telve ngei tur a ni tih chu danin a phut tlat thu a sawi a. Opposition Leader an lo awm lem loh pawhin Principle of Natural Justice kenkawh a nih theihna turin Legislative Assembly-a Group lian ber Leader chu he Committee-ah hian telh a ni ve mai thin tih a sawi a. “Pu Hawla hunlai pawh khan Group Leader ka nihna angin min telh ve mai thin a ni. Pu Rama CM a rawn nih nawn leh hnuah erawh hi chuan Lok Ayukta Chairman ruatna tur bikah hian min telh ve duh ta lova. Selection Committee an dinah hian Chairman chu Chief Minister a ni a. Tin, kan Assembly Speaker leh Guwahati High Court Judge te chu member an ni,” a ti.

Lalduhoma chuan Feb. ni 8 leh ni 9, 2019-ah Video Conferencing hmangin meeting koh a nih thu leh chutah chuan ‘Opposition Leader hi he Selection Committee-ah hian telh ve kher a tul love’ tia thutlukna siamin, chuta tang chuan a tel ta lo tih a sawi a. Amaherawhchu, a hnu lama Selection Committee lo awm lehah telh a nih leh si tih pawh sawiin, CIC atana Lalnunmawia Chuaungo IAS ruat a nih dawn pawh khan telh a nih thu a sawi a. Hetia Lok Ayukta Chairman ruat na tur bik chauha an han telh duh lohna chhan hi tunah hian a lo lang ta tih sawiin, “Tunhnai mai August ni 29, 2023 khan Selection Committee hi an thu a. Chutah chuan MNF Party leh sawrkar a chanvo lian tak chelh lai mek mi pakhat, a hming chu sawi ta lo ila, chu chu Lok Ayukta Chairman nihtir tumna leh a member atan SP tanglai pension tep tawh, IPS pawh la confer loh chu dah tumna a awm tih hriatchhuah a ni ta a ni,” a ti.

Lok Ayukta Chairman term hi nakum March thlaa tawp chauh tur a nih thu leh Term a tawp hma hma leh inthlanpui puan a nih tep tawh laia hetiang ruahmanna kalpui a ni chu ngaihzam chi nia a hriat loh thu a sawi a, “MNF hian inthlan lo awm turah hian sawrkar an inring tawh lova, sawrkar thar hnuaiah thubuai chi hrang hrang nei dawn a inngaihna hi an nei a, chumi an hlauthawng chuan chu’ng lak a lo inven lawk nan anmahni humtu tur Lok Ayukta hi tun atanga lo buatsaih duhin an pawngsual ta mai niin alang a ni,” a ti bawk.