Kawng siamna sum tih chingpenna thubuai ah CADC-a CEM hlui thiamloh chantir a ni

Chakma Autonomous District Council (CADC)-a CEM hlui Kali Kumar Tongchangya chu Aizawl District Court-a Special Judge (Prevention of Corruption Act) Dr. HTC. Lalrinchhana chuan eiruk thubuai ah thiamloh chantirin Jail-ah dahluh nghal a ni a, Vawiin hian a hremna tur puan a ni ang.

He thubuai hi Under Secretary to the Government of Mizoram, District Council & Minority Affairs Department-in Chakma Autonomous District Council (CADC) chhunga hmasawnna tur sumpai chingpen ni ngei a lang chungchang July 26, 2018-a n Anti-Corruption Bureau (ACB)-a thubuai (FIR) a thehluh atanga intan a ni a. ACB te hnuchhuina a tarlan a nih dan chuan Non-Lapsable Central Pool of Resources (NLCPR) hnuaiah kum 2009-2013 chhung khan CADC hian Longpuighat leh Kukurduleya khaw inkar kawng siamna tur atan a vawikhatna (1st Installment) ah cheng nuai 382.98 dawngin, a tumhnihna (2nd Installment) atan cheng nuai 382.99 dawng lehin, a tum thumna (3rd Installment) atan cheng nuai 363.88 an dawng leh a, heta tana an sum dawn hi a vaiin cheng nuai 1129.85 zet a ni.

Court thuremna atanga a lan danin hetihlai hian Kali Kumar Tongchangya hi CADC-ah Chief Executive Member niin pawisa a khawih chingpen hi a vaiin Rs. 179,03,773/- nia chhut a ni a. ABC ten an chhuina atanga a lan danin CADC-a Executive Secretary cum DDO Digamber Chakma chuan Kali Kumar Tongchangya a thupek angin a chunga tarlan sumpai atanga Rs. 9,03,773/- chu dikhlel takin a pechhuak a, heng sum a pekchhuahna te hi Longpuighat-ah Block Congress Office tur hmun leh In dinglai leina atan Kina Ratan Chakma, Vaseitlang-I hnenah July 4, 2012-ah Rs.2,00,000/- leh October 4, 2012-ah Rs. 3,00,000/- a pe a. District Congress Office, Kamalanagar a mi In luahman leh Office tul (Stationery) atan April 25, 2012 khan Pu Arit Kanti Chakma, Kamalanagar-I hnenah Rs. 2,33,000/- a pe a. Sneha Lal Chakma, President, Block Congress Committee, Kamalanagar chu Chawngte atanga Aizawl a kalna tur Helicopter hire-na atan March 15, 2013 khan Rs.1,05,000/- a pe a. Block Congress Office, Longpuighat a mi thawmthatna atan Budhi, Longpuighat hnenah Rs. 65,773/- a pe bawk.

Heng bakah hian kum 2013-a CADC hnuaia MDC inthlanpui neih tur atan Congress Party Candidate mi 19 te hnenah Campaign senso atan mipui (Sawrkar) sum pechhuakin ACB te chuan sum chingpen zinga 1,26,00,000/- chu an manlet thung a, heng mi 19 te hi thu hretu ah hmang zuiin Longpuighat leh Kukurduleya inkar kawng siamthat hna hi sum tih chingpen a nih avang hian tun thlenga thawh zawh ala nih loh thu tarlan a ni a. He thubuai ah hian ACB lam hian thuhretu mi 40 chhawpchhuakin Kali Kumar Tongchangya hi thiamloh chantir (Convict) a ni a, sum hmuh let Rs. 1,26,00,000/- hi sawrkar sum bawm-a dah nghal tura thupek siam a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar