Governor hovin World Day of the Deaf-ah cheng vbc. 6.4 man Bengdar semchhuah a ni

Khawvel puma bengngawngte puala ni bik 'World Day of the Deaf' chu nimin khan Raj Bhavan Durbar Hall-ah hman niin he hunah hian Governor Dr.Hari Babu Kambhampati chuan Bengdar mamawhtu zirlai thlanchhuah 320 hman turin Bengdar tha chi, pakhat Rs 20,000/- chuang man, a vaia cheng vbc. 6.4 man chu a semchhuak a ni.

COAL India Limited hnuaia Corporate Social Responsibility(CSR) atanga Deen Dayal Sravana Foundation (DDSF), Andhra Pradesh in an lakchhuah Bengdar a semna hunah hian Governor chuan Mizoram-a zirlaite zinga Beng lama harsatna nei te tana thil tangkai tak COAL India Limited hnuaia CSR kaltlanga hmuh a nih theih na atan thawktu pawimawh tak Deen Dayal Sravana Foundation (DDSF) chungah lawmthu sawiin, Mizoram-a zirilai beng lama harsatna nei te zawnchhuah a nih kawnga hmalatu Health Minister Dr. R. Lalthangliana leh a hnuaia hnathawk, Health Department Official te chungah lawm thu a sawi a. Andhra Pradesh-ah Bengdar a thlawna sem a ni tih a hriat veleh Mizorama sem a nih ve theih nan theihtawp a chhuah nghal tih sawiin, Mizoram Sawrkar lamah Health Department hotute a sawipui hnuah Khawvel pum huapa Ni pawimawh tak, 'World Day of the Deaf' puala sem theih a lo nih tak thu a sawi a. He ni pual hian Beng lama harsatna tawk te chu khua leh tui ten kan theih angin kan tanpui a ngai a ni tih a sawi bawk.

Governor chuan Ministry of Social Justice and Empowerment hnuaiah Disabled Persons for purchasing/Fitting of Aids/Appliances (ADIP) kaltlangin Beng lamah harsatna nei te tan tanpuina a dawn theih thu pawh he hunah hian sawiin, ZMC pawh hemi kawnga hmala thei tura ruat zingah a tel nia a hriat thu leh hun reiloteah ZMC kaltlanga he hmalakna hi kalpui a nih tur thu a sawi bawk.

He hunah hian khual zahawm Health Minister Dr. R. Lalthangliana pawhin Governor thahnem ngaihna zarah a sum zawnga teh pawha cheng tam tham tak senna tur, zirlai Beng thalo te tana thil tangkai tak tih a lo ni ta chu a lawmawm hle tih a sawi a. Bengdar semchhuah tak te rawn la chhuaktu Deen Dayal Sravana Foundation (DDSF) chungah lawmthu sawiin, tuna an hmalaknaah tawp mai lova Mizoramin a mamawh anga hmalakna huang rawn zauh zelin turin a sawm a. Sawrkar hmalakna hrang hrangte a tarlang bawk.

Nimin-a he hun hmanna ah hian Governor Dr. Hari Babu Kambhampati chuan he huna tel tura sawm Redeem Garden & Ephatha Special School atanga naupang thlan chhuah mi 21 bakah Ephatha Special School naupang pali, an vaiin naupang 25 te hnenah bengdar hi a sem a. NPPCD kaltlanga Bengdar semchhuahte hi Call India Limited ten an CSR hmanga an rawn sponsor a ni a. Call India Limited te hian NGO Partner atan Deen Dayal Sravana Foundation (DDSF) an hmang a. Anni nena thawk hovin National Programme for Prevention and Control of Deafness (NPPCD) thawktute chuan Mizoram chhunga Bengngawng, Bengdar vuah ngai zawn-chhuah hna nasa takin an kalpui a ni.

Governor hova hun hman rual hian DHME Conference Hall, MINECO-ah Bengdar vuah ngai midang 177 te chu kokhawm niin an measurement (Ear Mould Inpression) lak a ni a, nimin khan Aizawl East-ah 103, Aizawl West-ah 8; Kolasib District-ah 32, Mamit District-ah 11, Saitual District-ah 1 leh Serchhip District-ah 22, an vaiin mi 177 te measurement lak sak an ni a. Hetiang hian District dangah pawh hmalak zui a ni ang.

World Day of the Deaf puala hun hman hi Esther Lal Ruatkimi, Principal Secretary H&FW chuan kaihruaiin Dr. Lalramnghaki ENT Surgeon, NPPCD, Civil Hospital Aizawl chuan kumin-a he ni thupui atana thlan hmangin thu a sawi bawk a ni.