Latest News

Champhai-a Conservator of Forests, Eastern Circle Office Building thar hawn a ni

Champhai Bethel Veng-a cheng nuai 105.57 senga sak, Conservator of Forests, Eastern Circle Office Building thar chu nimin khan EF&CC Minister TJ. Lalnuntluanga chuan a hawng.

EF&CC Minister chuan Conservator of Forests, Eastern Circle Office hawn thar chuan ram leh ngaw humhalh chungchangah te leh kan Environment humhalhna kawngah Forest Department tha nasa takin a ti chak dawn tih sawiin, Forest Department chuan finchhuahtu an mamawh thin hle tih a sawi a, finchhuahna tur an hriat phawt chuan inthlahrung lova thurawn pe zel turin kalkhawm te a sawm bawk. EF&CC Minister chuan Champhai chu Internaltional Boundary a awm anih angin ramsa man a tam hle tih a sawi a, heng an ramsa man te enkawl zui zel dan turah buaina leh harsatna an tawk fo tih sawiin, heng ramsa man te hi enkawl zui an nihna turin hmalak a nih thu a sawi a, Rescue Centre dinna turin cheng nuai 1091 sanction tihfel a ni tawh tih a sawi bawk.

Champhai-ah Botanical Garden leh Nature Learning Centre changtlung tak nei tura hmalak mek anih thu pawh Minister chuan sawiin, khawpui chhung ngaw siam turin Nagar Van buatsaih a nih thu a sawi a, khaw 14-ah te hna thawh mek a nih thu a sawi a, Champhai chu khualzin hipna hmun pawimawh taka hman an tum thu a sawiin, Swadesh Darshan 2 hmangin Tlangsam ah hmalakna tur hrang hrang an neih thu a sawi bawk.

Conservator of Forests, Eastern Circle Office Building hi cheng nuai 105.57 hmanga sak niin Nov. 29, 2022 atang khan sak a ni a, April ni 5, 2023-ah lungphum phumin September ni 23, 2023-ah sak zawh a ni.

Comments

Popular News (Last 30 Days)