MNF in Candidate tur an tifel thawkhat ta

Mizoram-a rorellai MNF Party chuan kumin Assembly inthlanpuia Assembly bial 40-a an Candidate turte an tifel thawkhat ta a, tunkar hian an Candidate turte hi hriat kim theih beisei a ni thung.

Inrinni khan MNF Nomination Committee chu an Party President leh Chief Minister Zoramthanga hovin an thukhawm leh a. Tun thla ni 9-a Assembly bial 38-a an Party Ticket-a ding tur an tihfel hmabak bial pahnih Aizawl South-II leh Chalfilh bial-a an Party Ticket-a ding turte ngaihtuahin, thutlukna an siam nghal a. Aizawl South-II bial-a ding turin kum 2018 MLA inthlanpui-a MNF Ticket-a lo ding tawh Denghmingthanga chu ruat nawn a ni a, Chalfilh bial-a ding tur erawh tihfel thawkhat ni tawh mah se, tunkar-a puan chhuah chauh an tum ni-a hriat a ni.

Thudawn danin, MNF MLA ni lai 27 zinga a tam zawk chu an Bial ngaiah an ding nawn dawn a, Robert Romawia Royte leh R. Lalzirliana te chuan an dinna bial an dawn dawn bakah Hrangturzo bialtu MLA leh Home Minister nilai Lalchamliana chu a ding nawn tawh dawn lo a, Hrangturzo bial-ah hian Lalremruata Chhangte a ding dawn a, Chalfilh bialtu MLA leh Assembly Speaker nilai Lalrinliana Sailo chu a bial ngaiah a din nawn dawn leh dawn loh hriat a la ni lo a. MNF MLA ni thin Siaha bialtu MLA, Dr. K. Beichhua pawh MNF hian an Party atanga an hnawhchhuah avangin BJP a zawm dawn tih a lo puang tawh bawk a ni. 

Kumin a Assembly inthlanpui neih turah hian ZPM chuan bial 40 zinga bial 39-a an Candidate tur an puang tawh a, Congress Party pawhin an Candidate tur hi tifel thawkhat tawhin Bial thenkhat chu puan a ni tawh a, Central lam an Candidate turte hi an thlen thin thung a ni.