Latest News

Khum 100 awmna Mamit District Hospital hawng

Khum 100 awm theihna tur ‘Mamit District Hospital’ chu nimin khan Health Minister Dr. R. Lalthangliana chuan a mamawh a piangte hman turin a hawng.

Mamit District Hospital hi Power Finance Corporation (CSR Initiative) atanga sum hmuh Rs. 16,93,35,000/- senga Zamzo Engineering, Construction & Consultancy te'n an sak niin, September 4, 2020-ah sak tan a ni a, Building hi Mizopa chhiara chhawng 5 niin First Floor-ah hian Elderly Ward dah a ni a. Male & Female ward bakah ward dangte a awm bawk a ni.

Nimin-a Mamit District Hospital hawnna hunah hian Health Minister Dr. R. Lalthangliana chuan Mamit chu India rama Aspirational District 115 zing a pakhat a nih thu sawiin, Aspirational District-ah hian thlur bing pawimawh tak tak pahnih- hriselna ngaih pawimawhna leh zirna ngaih pawimawhna a tel thu a sawi a. Hei hian hamthatna tam tak a keng tel a, he Hospital dinna atana pawisa hman chungchangah uluk takin bialtu MLA leh a thawktute'n hma lain, Infrastructure din piah lamah bungrua, khawl leh thildang bun nan hman nih thu leh bungrua thenkhat la bun belh a nih dawn thu a sawi bawk.

Health Minister chuan sawrkar hmalakna thenkhat tarlangin, Mamit District chhunga West Phaileng PHC chu Community Health Centre (CHC)-ah hlankai a nih thu a sawi a, Mizoram chhungah Clinic 235 hawn a nih thu leh heng ah hian hmun kilkawr-ah pawh nau neihna Facility te pawh a awm tawh thu a sawi a. Mizoram Health Strengthening Project chu kalpui niin hei hian mamawh zualpui tuamhlawmna a kalpui mek thu a sawi bawk.

Heng bakah hian District 3-ah CMO Office hawn a nih thu sawiin, Mamit bakah Siaha, Lawngtlai leh Champhai Hospital-ah 100 Bedded District Hospital hawn a nih tawh bakah, tun dinhmunah hmabak lian tak Serchhip-ah kalpui mek a nih thu a sawi a. Kolasib District-ah khum 100 awmna Hospital sak mek a nih thu leh ZMC leh Champhai Hospital-ah Covid in a hrinchhuah natna bik khirhkhan, Critical Care Block buatsaih a nih thu a sawi a, tunhnaiah Director of Nursing din leh a nih thu a sawi bawk.

Higher & Technical Education Department changtu ni bawk Dr. R. Lalthangliana hian nimin vek khan cheng nuai 100 senga sak Govt. Zawlnuam College-a Multipurpose Building chu a hawng nghal bawk a, he building hi Mizopa chhiara chhawng thum niin kum 2019 atanga Sky Ridge Construction & Consultancy Services ten a sak hna an thawh a ni. Govt. Zawlnuam College-ah hian Department paruk awmin zirlai 80 vel leh Zirtirtu 20 an awm mek a ni.

Comments

Popular News (Last 30 Days)