Serchhip District-a zirna In engemaw zat te dinhmun sang zawkah hlankai an ni

Chief Minister Zoramthanga hova nimin-a Council of Minister thukhawm chuan Mizoram a School thenkhat chu sawrkar-a dahngheh a remti a, School thenkhat chu dinhmun sang zawka dah an remti bawk a. Serchhip District-a zirna In engemaw zat chu dinhmun sang zawkah hian hlankai an ni.
Nimin-a Council of Minister thutkhawm neih zawh hnua thuthar thehdarhtute a kawmna ah School Education Minister Lalchhandama Ralte chuan Mizoram-a zirna In 180 te chu sawrkar a dahngheh (provincialized) an ni dawn tih sawiin, heng te hi Middle School 48, High School 120 leh Higher Secondary School 12-te niin kumin October 1 atangin sawrkar a dahngheh an nih tur thu hi a sawi a, amaherawh chu kum hnih (2) chhung chu Probation anga awmin kum 2025 atangin sawrkar School tak tak a ni ang.

Sawrkar School-a dahngheh tur Higher Secondary School 12 zingah hian Serchhip District atangin North Vanlaiphai HSS leh Thenzawl HSS te telin Aizawl District-ah 4, Hnahthial leh Khawzawl District-ah 2 ve ve leh Saitual leh Kolasib District-ah pakhat ve ve te an ni a. High School 120 zingah hian Serchhip District atangin School 11 telin Zoluti Memorial H/S, Millennium H/S Chhiahtlang, N. Mualcheng H/S, Hualliana H/S Hmuntha, Lianchhunga H/S Hualtu, Lungchhuan H/S, Hrangturzo H/S, Lungkawlh H/S, Sailulak H/S, Leng H/S leh Chalkamlova H/S Zote te an ni a. Middle School (Elementary Section) 48 zingah hian Bawktlang M/S, Chekawn M/S, Hmawngkawn M/S leh C. Zalawma M/S Thenzawl te an tel bawk a ni.

Heng bakah hian Council of Minister thukhawm hian Lumpsum School 52 te chu dinhmun sang zawkah hlangkaiin Provisional Adhoc Grant-in-Aid dinhmunah dah an ni bawk a, Provisional Adhoc GIA hi tunhma chuan awm ngai lovin, he dinhmuna hlankai takte hi Higher Secondary School 34, High School 11 leh Middle School pasarih an ni a, Provisional Adhoc GIA hnuaia thawk Zirtirtute chu Half basic leh Half DA angin hlawh pek an ni dawn a, hei hi sawrkar kumthar (2024-2025) atanga hman tan tur a ni thung. Heng dinhmun sang zawka hlankai zingah hian Serchhip District atangin Higher Secondary Section-ah Brilliant HSS Serchhip, Chhiahtlang HSS, Bungtlang HSS leh Hmingthangi Memorial HSS East Lungdar an tel a, High School Section-ah tel awm lovin Middle School (Elementary Section)-ah Keitum M/S-II chu an tel a ni.

Comments

Popular News (Last 30 Days)

LPG man bithliah thar