Latest News

Sawrkar bultumin a vawi khat nan Mim Kut hman a ni

Mizoram sawrkar ruahmanna hnuaia a hmasa ber atan nimin khan ‘Mim Kut’ hman a ni a, Mim Kut hman dan ruahmantu State Level Steering Committee Chairman leh Social Welfare & Tribal Affairs changtu Minister Er. Lalrinawma chu Kut Thlengtu a ni.

Aizawl Vanapa Hall-a Mim Kut hmanna ah hian Er. Lalrinawma chuan Mim Kut hman a ni chu lawmawm a tih thu sawiin, hmangaih kalta te puala remchang taka hun buatsaih chu tih thanah neih zel a beisei thu a sawi a. Hnam ziarang humhim pawimawhna sawiin, hmarchhak State hrang hranga hnam hrang hrangte hi pawnlam mi tan en mai chuan hmel inang tak tak, hriat hran har tak kan ni thei a; kan hranna pholangtu langsar tak chu kan Hnam ziarang leh tihphung kan neihte hi a ni, a ti a. Pathian in hnam angin min siam a, hnam chuan tihdan phung (customs & culture) a neih te hi hun kal zelah pawh chhawm nung zelin, chu mawhphurhna chu kan nei a ni, a ti.

Sawrkar laipuia Ministry of Tribal Affairs bultuma Department of Social Welfare & Tribal Affairs in Mim Kut puala hun a buatsaihah hian SW&TA Director Dr. Lalhriatzuali Ralte chuan a vawikhatna atana Mim Kut hmang tura ruahmanna siam a inbuatsaih chhoh dan te a sawi a. Mizo zingah Kristianna a luh hnua pi leh pu te’n hnam ziarang leh tihdan phunga an neih tam tak chu thlauhthla mahse, hun kal zelah ngaihtuahna tharin, a thalo lai te paih a, hnam ziarang te hi kan nun-ah senglet lehin, rinna nen pawh inkawprema kal theih dan ngaihtuah a, chutianga hma lam pan zelin kan kal tak thu a sawi a. Mim Kut hman pawh hi chutiang rilru pu a buatsaih a nih thu a sawi bawk.

Mim Kut pual hian veng engemawzat ah Thlanmual tihfai hnatlang neih a ni a. Chhung tinte an hmangaih kalta te puala chawhlui buatsaih a, thlan a pangpar dah, thlan tihfai leh midangte tana luangchhuak turin a buatsaihtute chuan mipui an ngen a. Nimin-a Vanapa Hall-a hun hman ah hian MKHC leh Central YMA atangin thusawi ngaihthlak a ni bawk a. MCO, Art & Culture Department, Central YMA Choir leh a dangte atangin hla chham, zai leh lam te ngaihthlak a thlirho a ni.

Comments

Popular News (Last 30 Days)