Latest News

Corporation-a P&E Department leh a nih chuan Eng chhit man a pun tur thu P&E Minister in a sawi

Power & Electricity Minister R. Lalzirliana chuan nimin khan Aizawl Press Club-ah thuthar thehdarhtute kawmin an Department sum hloh dante a tarlan rualin P&E Department chu Corporation-ah leh a nih chuan mipuiin Eng an chhit man nasa taka a pun tur thu a sawi.

Thuthar thehdarhtute a kawmna ah hian P&E Minister chuan Mizoram in Power Supply kan mamawh san lai berin Megawatt (MW) 159.12 kan hman thu sawiin, “Chu chu January 19, 2023-ah a ni a, kan mamawh hniam lai berin MW 45 vel kan mamawh. Hetihlai hian State-in kan tharchhuah MW 13 (Tuirial HEP leh Vankal Solar huam loin) vel a ni a, a bak zawng chu kan lei a ngai a ni,” a ti a. An Department hian an sum hmuhchhuah leh inenkawlna senso atana an hman atanga chhutin kum 2020-2021 ah cheng vbc. 408.29, kum 2021-2022 ah cheng vbc. 299 leh kum 2022-2023 ah cheng vbc. 203.81 an hloh tih a sawi bawk. P&E Minister chuan P&E Department chu Corporation-a leh mai duhna te a awm thu pawh sawiin, “Kan Chief Secretary kalchhuak ta khan leh ngei a duh a, hma pawh a la. Gujarat nen a khaikhin a, anni ang State lian leh intodelh nen chuan khaikhin chi kan ni chiah lo. Harsatna a awm avangin kan ti ta lo,” tiin, Corporation-a leh chu a thatna leh that lohna a awm tur thu a sawi.

P&E Minister chuan Thenzawl-ah kawlphetha megawatt 10 pechhuak thei Grid Connected Solar Power Plant siam mek a nih thu leh nitha hmanga kawlphetha siamchhuahna tura an ruahmanna siamte pawh NABARD chuan pawmin a siamna tur sum pawh sum hmahruai pawh an dawng tawh niin a sawi a. Mizoram pumah Prepaid Smart Meter hman tuma hmalak mek a nih thu leh an ruahman ang hunah erawh an hmang thei dawn lo niin a sawi a. Sawrkar inEng chhit man a bat chungchang ah mipuiin Eng chhit man an pek in sawrkar in a tanpuina (subsidise) a daih loh thu leh Mizoram sawrkarin tun hnai kum li chhunga power lei na’na a sum hman chu cheng vbc. 1,835.3 a nih thu a sawi bawk.

P&E Minister chuan Tuivai Hydel Project siam tum a nih thu sawiin, kawlphetha MW 210 siam theihna tur he Project atan hian sawrkar laipui chu Viability Gap Funding pe turin dawr mek a nih thu a sawi bawk.

Comments

Popular News (Last 30 Days)