Assam Rifles hna thawk tha te chawimawina hlan

Mizoram Governor Dr. Hari Babu Kambhampati chuan nimin khan Assam Rifles hnuaia Jawan hna thawk tha thlanchhuah mi 23 te hnenah chawimawina, Governor’s Gold leh Silver Medals a hlan.

Inspector General Assam Rifles (East) kaihhruaina hnuaiah Circular Lawn, Raj Bhavan-a hemi puala inkhawm buatsaih ah Governor chuan ram venhimna kawngah Assam Rifles ten Mizoram ramri hrulah hna pawimawh tak an thawk tih sawiin, Assam Rifles te thawhhrimna leh State sawrkar hnathawkte an thawhpui that avaning ralthuam, ruihhlo leh dan lova bungraw tawlh tam tak man a ni tawh tih a sawi a. Assam Rifles zingah sipai chhuanawm tak tak heti zat chawimawi tur an awm chu lawmawm a tih thu sawiin, Assam Rifles Officer te leh sipai zawng zawngte chu state sawrkar hnuaia dan leh thupek kengkawhtute tha taka thawhpui chhunzawm a, Mizoram himna leh muanna atana an theihtawp chhuah chhunzawm zel turin a fuih a ni. Governor chuan Mizoram in kan hma lawkah inthlan kan hmachhawn dawn avangin Assam Rifles te chu an duty-na hmunah fimkhur lehzual turin a chah nghal bawk.

Nimin-a he hun hmanna ah hian Chief Secretary Dr. Renu Sharma, Mizoram DGP Anil Shukla, Major General Vinod Kumar Nambiar, YSM, SM, Inspector General Assam Rifles (East) leh Brigadier Girish Upadhya, SM, VSM, DIG, 23 Sector Assam Rifles bakah Assam Rifles Officer te leh sawm bik te an tel a ni.