Kawlphetha-a intodelh tura nasa taka hma an lak thu P&E Minister in a sawi

Power & Electricity Department changtu Minister F. Rodingliana chuan Kawlphetha a intodelh turin nasa takin hma an lak thu sawiin, “Eptu party ten dawt leh thutling lo hmanga min beihna ah hian buai tur kan ni lo, Pathian leh Mipuite kan lama an tan chuan a tawk a ni,” a ti.

ZPM in Chhung Inkhawm nimin-a an party Office, Aizawl-a an neih ah P&E Department changtu Minister F. Rodingliana chuan Kawlphetha a intodelh turin nasa takin hma an lak thu sawiin, “Tuirini Project bikah, sawrkar hmasa ten he Project an lo hnawl tawh chu a DPR te kan keu thar leh a, Central lama kan tlanthlak pui hnuin he project hlamchhiah mai tur pawh tihnunin a lo awm leh ta a ni,” a ti a. Tuivai Project pawh an buaipui thu sawiin, “Kum 18 chhung sawrkar hmasa lamin a bu an lo keu tawh loh leh DPR hlui tawh tak chu kan han thar thawh leh a, sawrkar hmasate ruahmanna anga kalpui dawn chuan he tuikhuah hian Manipur State ram engemawzat a chim dawn a, hei hi keini chuan harsatna awm theite kan ven avangin ruahmanna thar kan siam a, a hmunah kalin a tuikhuah chim chin tur kan tihniam ta a, km 32 chin khuapin Manipur State nen intibuai lovin he Project atang hian MW 160 atanga MW 180 tharchhuah theih kan in beisei a, Mizoram in tuna kan mamawh san lai ber hian MW 163 a ni,” tiin Central Sawrkar chuan he project atan hian vbc. 2.80 min pek thu leh thla 18 chhunga zo turin inremna an ziak tih a sawi a. “A hlawhtlinna kan hmuh hunah chuan Mizoram Power mamawh chu kan tharchhuak thei tawh dawn a, chutiang zelin Tlawng leh Tuichang khuap tur pawhin hma kan la mek a, Tuichang DPR pawh kan peih thawkhat tawh, MW 52 chhuak thei turin ruahmanna kan siam bawk a ni,” a ti bawk.

Tuirial tuikhuah chu Sawrkar hmasa hun laiin agreement a fuh lo tih pawh P&E Minister chuan sawiin, “A power siam chhuah man to takin kan lei a ngai a, kan lei loh pawhin agreement anga pawisa kan chawi tho angai si a, Tuirial tuikhuah khu sawrkar tan phurrit a ni a, Chuvangin Sawkar thar hmalakna turah chuan Tuirial project ang hian agreement siam kan tum ve lo,” a ti bawk.

P&E Minister chuan ZPM Ministry beitute chu ZPM Party a dintirha beitute tho kha an la ni tih sawiin, “Heng min beihnate hi kan Party tan malsawmna a ni a, kan ram rorelnaa Pathian ram tundin kan tumzia mipuiten min hriatpui chuan a tawk hle a, eptu party ten dawt leh thutling lo hmanga min beihna ah hian buai tur kan ni lo, Pathian leh Mipuite kan lama an tan chuan a tawk a ni,” a ti bawk.