Tour de Hmuifang 3rd Edition neih a ni

Department of Tourism leh Mizoram Cycling Association tangkawp buatsaih Tour de Hmuifang 3rd Edition chu Inrinni khan neih niin mi 59 zet an tel a ni.

Mizoram infiamna huangchhunga inelna hautak ber te zinga mi, kawngthui zawha thirsakawr intlansiakna, Tour de Hmuifang vawi 3-na hi Inrinni zing khan Aizawl Vanapa hall kawt atanga neih niin Sports Minister Robert Romawia Royte chuan a vailiam a, Tour de Hmuifang in ngaihven a hlawh telh telh chu lawmawm a tih thu leh kumtin a thil thleng (annual event) a ngaih theih a nih tak thu a sawi a. Mizoram Cycling Association chu Mizoram Sports Association hnuaiah ziahluh a nih tawh thu leh Cycling Federation of India nena inzawmna (affliation) beisei mek a nih thu a sawi bawk.

Tour de Hmuifang-ah hian tel tura hming pelut 64 zingah mipa 54 leh hmeichhia 5 telin State pawn atangin mi 2 an tel a, Junior (kum 18 hnuailam)-ah Vanlalruata, Tuirial pakhatnaniin Masters (kum 35 chin chunglam)-ah Peter Zohmingliana, Bungkawn chu pakhatna a ni thung a. Open (Road Category)-ah Dr. Lalrinawma, Hunthar pakhatna niin inelna hautak ber Elite Category-ah Richard Zorinsanga, Thenzawl Field Veng chu pakhatna a ni bawk.

Tour de Hmuifang hi tun thla ni 27-a World Tourism Day hman tur denchhena huaihawt niin he inelna ah hian Category chi hrang panga – Junior, Elite, Master leh Road (Open) Category bakah a vawikhatnan Hmeichhe Category (Exhibition) buatsaih a ni bawk a. Junior leh Masters Category te hi Maubuang khawchhungah lutin, Thiak khawchhungah lut lehin Hmuifang-ah an thleng a. Open (Road) hi Hmuifang kawngdung pangngaiah an tlan a, Elite hi Maubuang Damdiai atangin Changte-ah an chhuk a, Samlukhai-ah lawnin Chamring lam atangin Hmuifang an lut thung a ni.