Serchhip-ah SSU General Assembly nei tan

Students’ Self-Support Union (SSU) General Assembly vawi 36-na chu nimin khan Serchhip-ah neih tan a ni a, zanin hian he Assembly hi a tiak ang.
Zirlai mahni-a inchawm te telna SSU General Assembly hi nimin chawhnu lam khan Serchhip Press Club-ah neih tan niin an President Darhmingliana kaihhruaiin Rorelna hun hman a ni a, an thurel zingah Elementary Level-ah Moral Education dah a nih leh theih nan sawrkar ah rawtna thlen nise tiin Mizoram pumah Intodelh leh Career Drive neih rel a ni a. Kum 2024 chhung in Mizoram sawrkar hnuaia School-te (a bikin Primary School Level-ah) zirchianna neih a, a tul anga hmalak relin, College Level-ah Debate Competition buatsaih thin an rel a. Hruaitu thar thlanna neiin Vawiin ah thlantlin te puan an ni ang.

SSU General Assembly hi nizan khan Serchhip Auditorium-ah Palai Lawm Inkhawm neih niin Serchhip Addl. DC James Lalnithanga chuan khualtha niin a hmanpui a, Souvenir chu tlangzarh niin sawmbik te atangin thusawi ngaihthlak a ni bawk. He Assembly hi Vawiin hian Serchhip Auditorium-ah chhunzawm a ni anga, Vantlang Inkhawm neiin Home Minister Lalchamliana chuan khuallian niin a hmanpui anga, Serchhip bialtu MLA Lalduhoma chuan khual zahawm niin a hmanpui bawk anga, chawhnu lamah MYC Chairman Dr. Vanlaltanpuia leh zan lamah EF&CC Minister TJ. Lalnuntluanga ten an hmanpui bawk ang. SSU General Assembly hmang tur hian Serchhip khaw pawn atangin palai 250 vel an rawn kal a ni.