Sawrkar laipui in Manipur atanga Mizoram-a raltlan tan an mamawh thil hrang hrang rawn pek a tum

Sawrkar laipui chuan Manipur buai avanga sahimna zawnga Mizoram-a rawn awm mekte tanpuina leh enkawlna atan pawisa ni lovin an mamawh tur thil rawn pek a tum a, Mizoram sawrkar pawhin hemi atana mamawh hrang hrangte chu sawrkar laipui-ah a thlen tawh a ni.

Home Department hotute sawi danin tunhnai khan Ministry of Home Affairs hotute chuan Mizoram sawrkar hotute rawn bia-in Manipur atanga Mizoram-a raltlan awm mekte chhawmdawla enkawlna tur atan an mamawh kimchang thehlut turin a rawn ti a. Hei hi Zirtawpni khan thawn thlak nghal niin thla 6 chhung atana buhfai, chawhmeh chi hrang hrang, Tel, Purun leh a dangte bakah damdawi lam an mamawhte ziahchhuah chu thawn a ni. Chief Minister Zoramthanga'n Manipur atanga sahimna zawnga Mizorama awm mekte tana sawrkar laipui tanpuina sum cheng vbc. 10 a dil atangin thla li (4) a liam tawh a, Chief Minister Zoramthanga hian May ni 16, 2023 khan sawrkar laipui hnenah cheng vbc. 5 dilin, Manipur atanga raltlan an pun chak tak em avangin March ni 23 khan cheng vbc. 10 a dil leh a ni.

Home Department hotute chuan India mi India ram chhung veka raltlante chhawmdawl leh enkawlna atana pawisafai ni lova a taka an mamawh eitur emaw, bungrua ang zawnga sawrkar laipuiin a pek hi an la hriat ngai loh thu an sawi a. Mizoram sawrkar hian Manipur atanga raltlan awm mekte tan hian state sawrkar sum bawm atangin cheng vbc. 5 a pechhuak tawh a. Hei hi buhfai an lo ei puk tawhna Food, Civil Supplies and Consumer Affairs Department hnena rulhna leh District hrang hrang Bawrhsap Pisa-in an lo senso tawh phuhrukna atan hman chhoh mek zel a ni a. Sawrkar hnathawk hrang hrangin cheng nuai 81 chuang an thawhkhawm pawh Manipur atanga raltlante chhawmdawlna atan hman zel a ni dawn a ni.

Inrinni thleng khan Manipur atanga sahimna zawnga Mizorama rawn raltlan hi mi 11,973 an awm a, engemaw zat an kir leh tawh a ni.