Latest News

Vairengte-ah 1st IR Bn. Company Advance Hqrs. hawng

Home Minister Lalchamliana chuan nimin khan Kolasib District chhung Vairengte-ah 1st India Reserve (IR) Battalion Company Advance Headquarters thar a hawng.

Home Minister hian Vairengte IOC Veng-a 1st IR Bn. Company Advance Headquarters hmuna a hawnna lungphun khuhna puanzar pawt hawngin, Company Advance Headquarters building hrang hrang leh a hmunhma a fang kual nghal a. Vairengte Multipurpose Hall-a hun hman zui ah IR Company Advance Headquarters dah thar chuan ramri hnaih, a bikin Vairengte chhehvela chengte tan thla-muanna leh ngaih ngamna a thlen ngei a beisei thu sawiin, Company Advance Headquarters chu sipai 100 vel awmna tur a nih angin economy-ah pawh khawtlangin hma a sawnpui ngeia a rin thu a sawi a. Sawrkar leh Police ringawt tan ramri venhim a theih loh tih pawh sawiin, ramri buai chungchang ah Vairengte leh a chhehvel khawtlang mipui huaisenna leh inpekna a fakawm tak zet tiin, an chungah lawm thu a sawi a. Ramri buai chu chinfel mai a harsa nachungin, sawrkar in ram leh hnam tan theih tawpin hma a la reng a ni, a ti bawk.

He hunah hian IGP (Hqrs) Lalbiakthanga Khiangte pawhin thu sawiin, PHQ atang pawhin Company Advance Hqrs. tihchangtlun nan hma lak zel an tum thu a sawi bawk.

1st IR Bn. Company Advance Headquarters, Vairengte hi cheng nuai 223.71 senga din a ni a. June ni 10, 2022 khan hna tan niin, June ni 30, 2023-ah zawh a ni a. Sipai 30 awm theihna Bahrik (30-men barrack) pathum, Sipai 10 awm theihna Bahrik hun sawn theih (10-men barrack steel structure) 10, NCO/JCO Barrack cum Arm Kote square metre 285-a zau, Type-III Quarters pahnih, Kitchen cum Dining Hall square metre 48-a zau, latrine block pathum leh Sentry post pahnih a awm a ni.

Comments

Popular News (Last 30 Days)