Latest News

AB PM-JAY hnuaiah Mizoram in vbc. 84 hmang tawh

Sawrkar laipuiin mi retheite damloh nikhuaa man chawi lova inenkawlna tura a duan, Ayushman Bharat – Pradhan Mantri Jan Arogya Yojana hnuaiah Mizoramin cheng vbc. 84 chuang a hmang tawh.

Health Department thawktute sawi danin September, 2018 atanga hman AB PM-JAY hnuaiah hian kum 2018 atanga September 5, 2023 thleng khan dilna (claim) 1,01,096 dawn ni tawhin heng dilna zawng zawng belhkhawm hi Rs. 84,40,97,518 a tling a. AB PM-JAY hi sawrkar laipui, Ministry of Health & Family Welfare hnuaia scheme thar a niin Rashtriya Swasthya Bima Yojana (RSBY) thlakna tura duanchhuah a ni a. He Scheme thar hnuaiah hian chhungkua pakhatin kum khatah Rs. 5,00,000 thleng damdawi In-a an inenkawlna senso an bill thei tawh a. October 1, 2018 atang khan Mizoram-ah hman tan a ni.

He Scheme hnuaia inenkawlna hi Package System-a kalpui a ni a, tun dinhmunah package 2,223 a awm mek a. Package rate hian investigation man, damdawi man, in zai senso, chaw, Nursing senso, Doctor visit senso, etc. a huam tel vek a ni.

He scheme hmang theite chu kum 2011 Socio Economic Caste Census list atanga thlanchhuahte bakah kum 2018 RSBY Smart Card neite an ni a. Heng bakah hian Mizoram sawrkar chuan NFSA (AAY leh PHH) Ration Card neite dahluh tumin hma an la mek a, hemi atan hian October 14, 2023 hian training neih tum a ni.

Health Minister Dr. R.Lalthangliana chuan tunhnaia Press mite a kawmnaah September 5, 2023 thleng khan Mizoram State Health Care Society chuan damlote bill pek tur Rs. 63,88,79,817 a la nei tih an sawi a. MHCS-ah mi 26,569 inziaklut an awm tawh tih sawiin, hengte hi AAY chhungkaw 3,721, PHH 12,229, Non-FSA 10,422 leh Ration Card nei lo 197 te an ni tih an sawi.

AB PM-JAY hi sawrkar damdawi In leh private damdawi in pathum - 7th Day damdawi In, Nazareth Hospital leh Eye Care Hospital-ah te hman theih a ni a, hetah hian damloten cheng nuai 5 thleng an bill let thei a. MSHCS hnuaiah erawh cheng nuai 2 thleng bill let theih a ni thung.

Comments

Popular News (Last 30 Days)