Latest News

Serchhip-a neih SSU General Assembly vawi 36-na EF&CC Minister leh bialtu MLA in an hmanpui

Students' Self-Support Union (SSU) General Assembly vawi 36-na Serchhip Auditorium a neih chu nimin khan EF&CC Minister TJ. Lalnuntluanga chuan khuallian niin a hmanpui a, Serchhip Bialtu MLA Lalduhoma chuan khualzahawm nia hmanpui bawkin nizan khan he Assembly hi a tiak a ni.

Serchhip Auditorium-a SSU General Assembly hmanpuitu EF&CC Minister TJ. Lalnuntluanga chuan Zirlai pawl-a lo tel ve tawh thin a nih thu leh rawlthar an nih atanga an lo inhman ve thin thu sawiin, kum 1995-ah Champhai-ah SSU chu an lo din ve tawh thu a sawi a. SSU thiltum leh hmalakna te chu tha a tih thu sawiin, zirlaite rilru ah mahni intodelh leh kuthnathawh pawimawh zia tuh zel a pawimawh thu a sawi a. Zirlai pawl hruaitu an nih hunlai pawhin kuthnathawh leh hnathawh thawmhnaw ha-a khawlai-a kal a zahthlak loh tih lantirna atan inzirtirna te an lo neih tawh thin thu te, Zirlai inhlawhfa duh tan hnathawh tur an lo ngaihtuah sak thin thu leh nu leh pa te pawisa dil chu a zahthlak tih inzirtirna te an lo kalpui tawh thu sawiin, hei hian rah tha a chhuah ve nia a hriat thu a sawi a. Mahni thawhchhuah sum chu kan renchem in kan hlut bik tih a sawi bawk.


TJ. Lalnuntluanga chuan SSU chu Zirlai pawl dang angin boruak lian tak nei ni ve lo mah se an hmalakna, mahni intodelh leh kuthnathawh chawisan chu kan Hnam tana lungphum pawimawh tak a nih thu a sawi a. Hemi kawnga inzirtirna an neih te chuan rah tha a chhuah zel a beisei thu leh inzirtirna neih zel a tul thu sawiin, he Assembly-a kal Zirlaite chu 'SSU Ambassador' ni haw theuh turin a chah a. He an hmalakna hi kan nunpui tlan chuan hlemhletna leh eirukna pawh a bo ngei tur thu a sawi bawk a. Hlawhtling tlaka hna kan thawh a pawimawh tih hre reng turin a chah bawk. Intodelh a pawimawh zia pawh Minister chuan sawiin, sawrkar hna sang thawk thei ten an thawh a that rualin, a thei ve lo te pawhin kan phak tawk ah zel intodelh tura hnathawh kan inhuam a tul thu a sawi a. Hna sang ringawt chu hna zahawm a ni lo tih sawiin, intodelh tura kan thawh theih ang tha taka kan thawh chu a zahawm thu leh Pathian in kan ramah hian intodelhna tur min pe tih kan hriat reng a pawimawh thu a sawi bawk.

He hunah hian khualzahawm Serchhip Bialtu MLA Lalduhoma pawhin SSU chu pawl pawimawh tak a ni tih sawiin, Member tam ringawt nih tum lova an dinchhan leh thiltum anga thawktu an nih chuan tlem mah se Ram leh chhungkaw tana malsawmna an nih a rin thu a sawi a. Tuna Officer lian kan tih tam tak te chu harsa taka lehkha zir thin, Zirtirtu indaihlo leh Facility nei tha lo a lehkha zir thin an ni tih sawiin, tunlaiah erawh chuan engkim ah Facility tha an neih tawh thu leh hlawhtling turin mihring an pawimawh thu a sawi a. He huna kalkhawm zirlaite chu lehkhabu chhiar uar tura chahin, ruihhlo do tlat turin a chah bawk.


Nimin-a SSU General Assembly hi SSU General Hqrs. Vice President Johan Lalremruata chuan kaihhruaiin Secretary General PC. Lalawmpuia chuan report a pek bakah an President Darhmingliana chuan thu a sawi bawk a. Students' Self-Support Union hi 27th May, 1985 khan din niin 'Zirna atan mahni intodelh' tih leh 'Kuthnathawh chawisan' tih te chu an thiltum te a ni.

SSU General Assembly vawi 36-na ah hian kum 2023-2025 chhunga an pawl hruaitu tur thlanna neiin President-ah Darhmingliana; Vice President-ah Johan Lalremruata, Secretary General-ah Benjamin J. Malsawmdawnga; Joint Secretary-ah Gordon C. Vanlalhruai-tluanga; Treasurer-ah Lalhruaizela leh Fin. Secretary-ah VL. Malsawmtluanga te thlantlin an ni.

Zirlai mahni-a intodelh tum te intel-khawmna pawl, Students’ Self-Support Union (SSU) General Assembly nimin-a neih ah hian chawhnu lamah ‘Intodelh Campaign & Career Awareness’ neiin nizan khan ‘Vangpui Kut’ hman chhunzawm leh a ni a, Zai leh lam chi hrang hrang entir a ni bawk.

Comments

Popular News (Last 30 Days)