Thalaite tan Project Sentinel MoU ziah a ni

Nimin khan Aizawl-a Assam Rifles Ground-ah Assam Rifles, NIEDO leh Axis Bank te chuan Project Sentinel - Centre of Educational Excellence, Skilling and Wellness atan thawhhona thuthlung (Memorandum of Understandings) an ziak a, he hun hi Governor Dr. Hari Babu Kambhampati chuan a hmanpui a ni.

Project Sentinel hi Assam Rifles leh NIEDO tangkawpin Mizoram-a thalai (zirlaite) hmakhua ngaiin zirna tha zawk an zir theihna tur leh State danga zirna In tha zawka lehkha an zir theihna atan hmalakna an kalpui tur a ni a. MoU hi 23 Sector Assam Rifles, National Integrity & Educational Development Organisation (NIEDO) leh Axis Bank aiawh ten Governor Dr Hari Babu Kambhampati leh Maj. Gen. VK. Nambiar YSM, SM, IGAR (East) uapna hnuaiah an ziak a ni.

Governor Dr. Hari Babu Kambhampati chuan Axis Bank leh NIEDO te’n Assam Rifles thahnem ngaihna an tawmpui a, Mizo thalai te hmakhua ti eng tura an rawn penchhuak chu Mizoram mipui leh a bikin zirlaite aiawhin lawmthu a sawi a. Project Sentinel hian Mizo zirlai thluak tha tak tak te chu sang lehzualah a vawrh dawn a, kan zirlai ten tun atanga kum 2 a lo ral chuan hlawhtlinna lian tham tak tak an rawn nei nual dawn a ni, a ti. Governor chuan zirlai thluak tha tak tak, chhungkaw sum dinhmun in a zirloh avanga an thlen tur thleng thei ta lo an awmtthin tih sawiin, Project Sentinel hnuaiah hian heng zirlai chhawmdawl ngai te tan hian remchanna duhawm tak a lo in herchhuah dawn thu leh he thawhhona hi Mizoram tana zirna huanga Mellung pawimawh tak a nih thu a sawi bawk.

Project Sentinel hi Full-time Residential Program niin he Project hnuaiah hian hmeichhe naupang leh mipa naupang 30 thlanchhuah te chu thla 12 chhung atan Engineering leh Medical Entrance Exam hrang hrang bakah Competitive Entrance Exam-ah Allied Stream te telin kaihhruaina uluk takin pek an ni dawn a. A tirah Zirlai, Science Stream hmanga Class 12 zo tawh, JEE leh NEET atana inbuatsaih mekte chu ngaih pawimawh hmasak an ni anga. Hemi hnuah Stream dang te pawh hrut chhoh zel a ni ang. Thla 12 chhung hian Competitive Exam huangah mithiam te ruaiin inkaihhruaina uluk takin Assam Rifles ten NIEDO leh Axis Bank te nena tangkawpin Assam Rifles Complex, Zokhawsang-ah an kalpui dawn a ni.

He Program hnuaiah hian Zirlaite chu Soft skills, Personality Development, Critical Life Competencies, Leadership Capabilities, Personal Conditioning, Wellness Programs, Vocational Training leh a dang te zirtirna pek a ni dawn a. Zirlaite thlan dan turah hian NIEDO Official te chu Mizoram hmun hrang hrangah kal kualin sikul an tlawh chhuak vek dawn a ni.