Latest News

Chhiahtlang Chhim Veng Branch YMA Silver Jubilee lawmna bialtu MLA in a hmanpui

Chhiahtlang Chhim Veng Branch YMA chuan nimin khan an kum 25-na, Silver Jubilee lawmin he hun hi bialtu MLA leh Social Welfare & Tribal Affairs Minister Er. Lalrinawma chuan a hmanpui a ni.

Chhiahtlang Chhim Veng Branch YMA Silver Jubilee lawmna hunah hian Er. Lalrinawma chuan kan ram-a pawl lian leh pawimawh tak YMA tha taka a kal zel chu lawmawm a tih thu sawiin, Chhiahtlang Chhim Veng Branch in kum 25 lai an lo thleng ta chu a lawmpui thu a sawi a. Tunhnaiah Uniform Civil Code (UCC) sawi rik ni thin mahse kan remna thu ziahah khan ‘Mizoram Legislative Assembly in a pass loh chuan pawm a ni lo ang,’ tih a nih avangin huaisen takin kan tang ngam a, hun kal tawha kan tawrhna nasa tak kha a thlawn lo a ni tih hi kan hriat thar leh a tha a ni, a ti.


Social Welfare & Tribal Affairs Minister chuan khawvel a zim tial tial a, chu chuan Hnam tenau zawkte a nek ral tial tial a, keini hnam tlemte hi kan boral loh nan keini ho hi nghet taka kan din tlat zel a ngai tih pawh sawiin, kan pipute nunzia kan chawinun zelna pakhat atan Mizote Kut pawimawh tak mai Mim Kut pawh hman thar leh tuma hmalak mek a nih thu a sawi a. Kan hnam nun leh ziarangte hi a bo chuan hnam bo kan ni mai dawn tih pawh sawiin, kan hnam kan ngaihsan a, kan bungruate kan hlut deuh deuh a tul thu a sawi a, hnamdang aiin kan dawihzep bik lo tih hre tharin, YMA pawhin kan hnam nun leh ziarangte kan vawnhim tlat a pawimawh thu te a sawi bawk.

Nimin-a Chhiahtlang Chhim Veng Branch YMA Silver Jubilee lawmna hun hi an Branch Vice President C. Thanvawra chuan kaihruaiin Khuallian hian Jubille lungphun a hawn hnuah inkhawm neih zui a ni a, Branch YMA Secretary K. Lalrintluanga chuan report pe in Chhiahtlang Chhim Veng Branch YMA hi January 17, 1982 (Pathianni)-ah Chhiahtlang Branch hnuaiah ‘Section F’ ni tura din a ni a. January ni 29, 1998-ah Chhiahtlang Branch hnuaia Section hrang hrangte chu Branch puitlinga dah an nih angin ‘Chhiahtlang Chhim Veng Branch’ tih a lo ni ta a ni.

Chhiahtlang Chhim Veng Branch YMA-ah hian kumin 2023-ah hian Member Mipa 254 (Life member 13) Hmeichhia 101 (Life member 1), an vaiin member 355 an awm a, nimin a hun hman ah hian member boral te sunna hun hmangin Serchhip Sub-Hqrs. YMA hruaitute pawhin he hun hi an hmanpui bawk a ni.

Comments

Popular News (Last 30 Days)