Suposhan Diwas Motor Cycle Rally neih a ni

September thla chhunga ram pum-a ei leh in tha leh hrisel pawimawhna inzirtirna POSHAN Maah 2023 kal mekah Aizawl Thunders te nen ‘Suposhan Diwas Motor Cycle Rally’ chu nimin zing khan Aizawl-ah neih niin Social Welfare & Tribal Affairs Minister Er. Lalrinawma chuan Bawngkawn Brigade Road atangin Rally a tel te hi a vailiam a ni.

Suposhan Diwas Motor Cycle Rally-a tel te vailiamna hunah hian Minister Er. Lalrinawma chuan sawrkar laipuia Ministry lamin a ruahman angin POSHAN Maah-ah hian pa ten mawhphurhna pawimawh tak kan neih avangin ‘Pa te Ni’ (SUPOSHAN Diwas) pawh hi hman turin a rawn duan thu leh hemi ang hian Motorcycle Rally pawh hi buatsaih a nih thu a sawi.

Social Welfare & Tribal Affairs Minister chuan ei leh in tha kan nupui fanau ten an neih theih nan hian pa te (mipa te) hian mawh an phur nasa in, an himna pawh anmahni ah a innghat tlat tih a sawi a. Nu in nau a pai hlim atanga nau a neih thleng leh a enkawlna chu hmeichhiate kut chauh a dah chi a nih loh bakah mipate ko ah hmeichhia te mawhphurhna ai nasa zawk a innghah thu a sawi a. Nu in nau a pai in an hriselna endik pui te, nau a pian hun a nu in hnute tui tha taka a pek theih nana nupuite ei leh in tha leh hrisel lo pek te leh naute hrisel leh than tha neih theih nana fate enkawl te mipa mawhphurhna, mipa ko a innghat tlat a nih thu a sawi a. Mithiam ten an zirchianna ah chuan nu in nau a pai atanga naupang kum 2 a tlin thleng hi naute hmalam hun thui taka hriltu a nih thu a sawi bawk.

Motorcycle Rally hi Bawngkawn Brigade Road atangin Ramhlun kawng-ah Silaimual thleng neih a ni a. Rally-a tel te vailiamna inkhawm hi Women & Child Development Director Zoramthangi Chhangte chuan kaihruaiin, kalkhawm zawng zawng te an aurual bawk a ni.