Grape thartute harsatna tawh pawi tih thu sawi

ZPM Leader Lalduhoma chuan Grape thartu ten harsatna an tawk chu pawi an tih thu leh hriatthiam har an tih thu a sawi.

Lalduhoma hian nimin khan Champhai a Grape Winery tlawhin Champhai Grape Growers Society hruaitute nen inkawmna an nei a, he hunah hian kan ramchhunga thar ngei Grape kan ram chhûngah a sawngbawlna mumal tak chu alawmawm hle tih sawiin, “Chutih laia harsatna in tawk mai hi pawi kan tiin hriatthiam har kan ti,” tiin Food Safety and Standard Authority of India in Grape Wine chu Food item-ah a puan thu leh Winery pawh Food Processing Unit-a ngaih a ni tih a sawi a, “He in Winery pawh hi Zu siamna factory a ni lo va, Food Proceesing Unit zinga mi a ni,” a ti bawk.

Lalduhoma chuan kan thenawm State te pawhin hetiang lamah hian hma an la nasa em em tih sawiin, State sawrkar pawhin nasa takin a pui niin a sawi a, Grape chingtu ten ram pawn thlenga thawnchhuah dan turte ngaihtuahin hma nasa takin in la mek tih pawh an hriatpui thu leh tuna hetiang dinhmun an thleng ta mai chu pawi an ti em em tih a sawi a, “Theihtawpa lo tlangau pui che u hi tun dinhmunah chuan kan tih theih tawk a ni hrih a, tuna kan thlen chinah hi chuan lungawina a awm ta lo a, Pathian leh mipui zarah thuneihna kan chang a nih chuan keini chuan kan policy hnuaiah tanpuina kan pe dawn che u a. Enterpreneurship hi keini chuan kan ngai pawimawh a, bul tanpui tlak an nih a, project hlawhtling tur a nih chuan kan pui dawn a ni. Sawrkar hi guarantor-ah a tang mai dawn a, thalai thiamna nei si bul tanna nei lo te kan chawikang dawn a ni,” a ti bawk.