Lenkawl

Tunhnai a Khumtung khua mi 67 ten Bekang an eisual leh nausen pakhat thih phah chu enfiah a nih hnuah Khawsikpui (typhoid) thlen theitu natna hrik ‘Salmonella Typhi’ hmuhchhuah a ni.

Mizoram State Transport Authority (STA) mipui phur chi lirthei-a chuanman tur bithliah thar a siam a, he rate thar hman tan nghal tura tih a ni.

Nimin March 24, 2024 (Pathianni) kha Kristian te Ni pawimawh, Tumkau Ni a ni a, Kohhran hrang hrang ten he ni hi urhsun takin an hmang a ni. Isua Krista Jerusalem-a ropui taka a luhna ni, Tumkau ni pual hian nimin zing khan Kohhran tam ber te chuan Tumkau chawi-a kawng zawhin, “Hosanna! Lalpa hminga lo kal chu fakin awm rawh se, Ram lo thleng tur, kan Pa Davida ram chu chawimawiin awm rawh se. Chungnung berah khian Hosanna!” tiin an aurual a, Pathian faka zai in thusawi te ngaih-thlak a ni a, chhun lama kawngzawh te pawh an awm bawk a ni. Kohhran hrang hrangte hian nizan thleng khan Tumkau ni pual hian hun an hmang hlawm a ni.

United Pentecostal Church (UPC) North East India-a Hmeichhe Pawl, Ladies Auxiliary Department (LAD) te chuan nimin Pathianni hmang khan Pastor Bial Inkhawmpui chu Bial hrang hrangah an nei a, Serchhip Bial LAD Inkhawpui vawi 56-na pawh Electric Veng UPC Biak In-ah Zirtawpni kalta zan atang khan neih a ni a, thupui atan ‘I thuthlung ah hian a derin kan ti ngai lo’ tih chu hman niin Speaker atan Sis. K. Lalhmachhuani B/WNMD chu hman a ni a, nizan khan he Inkhawmpui hi a tiak a ni.

Inrinni zan zanlai pelh hnua ruah leh Tek thawk ah khan Sihfa khuaa H. Thanzama In, Assam Type) chu tekin a deng a, bungrua thenkhat leh an In bang leh Darthlalang engemaw zat a chhia a, mihring thli leh hliam erawh an awm lo thung. Tek tla in a tihchhiat In hi te hi nimin khan mi tlawmngai ten an thawmthat sak a ni.

Inrinni kalta khan ‘Veterans Day’ chu Aizawl a 23 Sector Assam Rifles hmunah Assam Rifles Ex-Servicemen te chuan, Sipai thihsan, hmeithai te leh an chhungte nen an hmang a, he hunah hian Ex-Servicemen, Hmeithai te leh an laichin te harsatna hrang hrang chu Assam Rifles Welfare kaltlanga tanpuina pek tum an nih thu tarlan a ni.

Mizoram-ah tunhnai kum 4 chhungin naupang chunga hursualna kaihhnawih, POCSO Act hmanga thubuai ziahluh a pun laiin, pawngsual kaihhnawih thubuai erawh a tlahniam hret. CID (Crime Branch) chhinchhiah danin, kum 2020 atanga 2023 chhung khan Mizoram-ah naupang chunga hleilenna leh thildanga naupang laka pawikhawihna, POCSO Act hmanga thu-buai ziahluh chu a vaiin 439 a awm a, kum 2020-a thubuai 110 awmin kum 2021-ah 113, kum 2022-ah 97 leh kum 2023-ah 119 a kai chho leh a. Pawngsual thubuai hi kum 2020-ah 36 a awm a, kum 2021-ah 25, kum 2022-ah 16 ah tlahniam in, kum 2023-ah 28 a awm leh a, kum 4 chhunga pawngsual thubuai ziahluh hi 105 a tling a ni.

Vairengte leh a chhehvela Kuhva chingtuten dan lova Kuhva ro hmanga sumdawng thinte chu Mizo leh Mizo inkar-a inhmuh thiamlohna a thlen hmaa an thil tih thin sim turin an ngen.

Environment and Social Justice (CESJ) chuan Mizoram-a Solar Power siamchhuah tuma hmalakna chu sum leh paia hlawkna awm lo leh leilung tana thil thalo nia an hriat avangin sawrkarin khaw hrang hrang VC-te Solar Plant hmun tur a dilna hnuhkir an ngen.

Aizawl Ainawn Veng (Govt. Complex tia hriat thin)-a sawrkar building leh quarters-te chu mihring chenna atan a him tawk tawh lova hriat a nih avangin thiah tura ruahman a ni a. Building thiah hmasak tur pawh ruahman fel a ni tawh.

Lok Sabha Inthlanpui neih tura MNF Candidate K. Vanlalvena chuan thlantlin a nih chuan NDA Seat-ah a thu dawn tih sawiin, ram leh Hnam leh Sakhaw himna turin theihtawpin Parliament chhung leh pawnah a tul apiang ti turin a inhuam tih a sawi.

Mizoram Legislative Assembly Speaker chuan Tuichawng Bialtu MLA Rasik Mohan Chakma chu MLA atanga ban a nih loh chhan tur April 15, 2024 hmaa insawifiah turin a hriattir.

Sawrkar hnathawkte Office kai chin hriatna tur, Biometric Attendance chu Mizoram New Capital Complex (MINECO)-ah hman a ni tawh tih Chief Minister Lalduhoma chuan sawiin, sawrkar Department pisa hrang hrangah dah belh a nih dawn thu a sawi bawk.

Lok Sabha Inthlanpui neih tura Serchhip District tana Expenditure Observer Anita Ritesh-i chuan nimin khan Serchhip rawn thlengin tun tum Lok Sabha Inthlanpui neih tura Serchhip District-a Expenditure Monitoring Team hrang hranga Member te nen Serchhip DC Meeting Hall-ah an thukhawm.

Mizoram Upa Pawl (MUP) Serchhip District Headquarters Assembly vawi 13-na chu nimin khan Serchhip Auditorium-ah neih a ni a, he hun hi Zaithiam leh Padma Shri dawng tawh Dr. KC. Runremsangi chuan Khuallian niin a hmanpui a ni.

Khawvel hmundangte rualin nimin khan Serchhip-ah ‘World Water Day 2024’ hman a ni a, he hun hi Serchhip Addl. DC James Lalnithanga chuan khuallian niin a hmanpui a ni.

Serchhip-a District Child Protection Unit (DCPU) Office chuan kumin a Serchhip District chhunga Sponsorship & Foster Care Fund atanga sponsorship an pek naupang 125 te leh an nu leh pa te chu nimin khan Serchhip Kawnpui VC Hall-ah kokhawmin he ruahmanna leh naupang humhalhna Dan leh hriattur pawimawh hrang hrangte an hrilhfiah.

Serchhip leh Thenzawl inkar Mat Lei chhaka kawng siamtu Company ten Lung an lakna hmun chu nimin khan Geology & Mining Department chuan a hmunah an rawn enfiah a, hemi chung-changa YMA in rawtna hrang hrang an siam te chu Company lam hian tih hlawhtlin an intiam a, karleh Thawhlehni-ah a hmuna enfiah leh tura tih a ni. Nimin vek khan Serchhip leh Keitum inkara leivung paihna pawh enfiah nghal a ni bawk.

Mizoram Merchant Association (MIMA) hruaitute chuan nimin khan Chief Minister Lalduhoma chu a Pisa-ah hmuin Mizo ram leh hnam tan ILP Board din rawtna an thlen a. ILP pek danah leh pek tawht en an ngaihsak zui loh thin avang te, an ILP dam leh dam loh ngaihtuah zui a nih loh bakah Sponsor-tute lahin an ngaihtuah zui bawk si loh chungchangte thlenin, ILP Board din tul an tih chhan hrang hrangte an thlen bawk.

District Legal Services Authority, Kolasib buatsaih ‘Skill Development Training for Undertrial Prisoners’ chu nimin khan Kolasib District Jail ah hawn a ni a, he Training hi chawlhkar khat chhung kalpui tur niin Jail-a awm mek te tan Puanthui, Pangpar khawi, Lu meh, Ei siam leh Carpentry-ah te training hi kalpui a ni ang.